कनकाई खबर / लियो क्लब अफ कनकाई सुरुङ्गाको वर्ष २०२०/२०२१ का लागि रबिन गुप्ता अध्यक्षमा सर्वसम्मत रुपमा चयन भएका छन् । क्लबको तेस्रो वार्षिक साधारणसभावाट गुप्ता अध्यक्षमा सर्वसम्मत चयन भएका हुन् ।
विश्वव्यापी महामारीका रुपमा फैलिएको कोरोना भाईरसको संक्रमणवाट बच्नकालागि नेपाल सरकारले गरेको लकडाउनका विच पनि क्लबले वार्षिक कार्यक्रम गर्नु पर्ने भएकाले सामाजिक दुरी कायम गर्दै साधारण सभा सम्पन्न गरेको बताइएको छ ।
स्थानीय स्तरमा पछिल्लो पुस्ताका युवाहरु माझ लोकप्रिय बन्दै आएका गुप्ता कनकाई बहुमुखी क्याम्पसमा स्नातक तहको तेस्रो वर्षमा अध्ययनरत एक जुझारु विद्यार्थीका रुपमा परिचित छन् । युवा रेडक्रस सर्कल कनकाई बहुमुखी क्याम्पस सुरुङ्गाको वर्तमान अध्यक्ष, सुरुङ्गा सहकार्य युवा क्लवको कार्यसमिति सदस्य, मानवता पहिला संस्थाको सहसचिब, कनकाई छठसेवा समाजको पुर्व कार्यसमिति सदस्य, सुरुङ्गा जेसीजको सदस्य लगायत विभिन्न सामाजिक संघसंस्थामा सक्रियताका साथ जिम्मेवारी बहन गर्दै आएका गुप्ताको नेतृत्वमा रहेको सामाजिक संस्था लियो क्लवले स्थानीय युवाहरुसँग सहकार्य गर्दै समाजको समृद्धिमा महत्वपूर्ण भूमिका खेल्ने विश्वास गरिएको छ ।
नवनिर्वाचित अध्यक्ष गुप्तासँगै क्लवको प्रथम उपाध्यक्षमा पारस भट्टराई, द्वितीय उपाध्यक्षमा साजन आचार्य, तृतीय उपाध्यक्षमा योगेश बस्नेत सर्वसम्मत रुपमा चयन भएका छन् ।
त्यस्तै अध्यक्षले आफ्नो कार्यकाल सफलता पूर्वक सम्पन्न गर्नकालागि सचिवमा जेनिस ओली र कोषाध्यक्षमा कनकाई सुरुङ्गा प्रेस क्लबका कार्यसमिति सदस्य समेत रहेका संचारकर्मी अनुप भण्डारी सर्वसम्मत रुपमा चयन भएको निर्वाचन समितिका संयोजक पंकज खड्काले बताएका छन् । एक वर्षे कार्यकाल रहने क्लवको अन्य पदहरुमा क्लवको पहिलो बैठकले मनोनित गरी कार्यसमितिलाई पूर्णता दिने नवनिर्वाचित अध्यक्ष गुप्ताले बताएका छन् । लियो क्लब वर्ष २०१९/२० का अध्यक्ष रोचक कार्कीको सभापतित्वमा साधारण सभा सम्पन्न भएको बताइएको छ ।
