राम निरौला,
कनकाई खबर / कोरोनाको कहरसँगै झापाको कनकाई सामुदायिक वन क्षेत्रमा सरसफाईसहित वृक्षरोपण गरिएको छ ।
विश्व वातावरण दिवसको अवसर पारेर आज शुक्रवार कनकाई सामुदायिक वन समूहले वृक्षरोपण गरेको हो । समुदायमा हस्तान्तरण भएको तराईकै पहिलो सामुदायिक वनका रुपमा रहेको यस वन समुहको क्षेत्रभित्र यसै आर्थिक वर्षभित्रमा ५ हजार बढी विभिन्न जातका उपयोगी विरुवा रोपण गर्ने योजना रहेको वन समूहका अध्यक्ष ख्याम ओलीले बताएका छन् । प्राकृतिक वनका रुपमा २६७.०६ हेक्टर क्षेत्रफलमा फैलिएको कनकाई सामुदायिक वन क्षेत्रमा वैज्ञानीक साथै धार्मिक दृष्टिले समेत महत्वपूर्ण मानिएका बेल, अमला, टिक, जामुन, तित्री लगायतका विरुवा रोपणलाई निरन्तरता दिने बन समुहका अध्यक्ष ओलीले जानकारी दिएका छन् ।
वातावरणका क्षेत्रमा निरन्तर सचेतना जगाउँदै आएको यस वन समूहको नेतृत्वमा सामुदायिक वन क्षेत्रको सडक बाटो लगायत खाली जमिनमा वृक्षरोपण गरीएको हो । यसरी रोपीएका सवै विरुवाहरु कनकाई सब डिभिजन वन कार्यालय सुरुङ्गाको सहयोगमा उपलव्ध भएको बताइएको छ । वन समूहका अध्यक्ष ओलीको सभापतित्वमा सम्पन्न भएको वृक्षरोपण कार्यक्रममा कनकाई नगर वडा नं.३ का वडाअध्यक्ष रुद्रप्रसाद चिमरीया, कनकाई सब डिभिजन वन कार्यालय सुरुङ्गाका रेन्जर राजेश घिमिरे लगायतले शुभकामना मन्तव्य राखेका थिए । वन समूहका उपाध्यक्ष ललितवहादुर कार्कीले स्वागत गरेको औपचारिक कार्यक्रमको संचालन वन समूहका सहसचिव श्रीप्रसाद खरेलले गरेका थिए ।
सोही अवसरमा वन समुहको नेतृत्वमा कनकाई महिला वातावरण संरक्षण समूह लगायत अन्य केही सामाजिक संघसंस्थाहरुसँगको सहकार्यमा सरसफाई गरिएको थियो । लोकमार्ग दक्षिण तर्फ रहेको वन समूहको बनस्पती संग्राहलयको आसपासमा सरसफाई गरिएको वन समूहकी सचिव मान्ता खरेलले बताएकी छन् । बन समूहका उपाध्यक्ष ललितबहादुर कार्कीको सभापतित्वमा सम्पन्न भएको सरसफाई कार्यक्रममा कनकाई नगर वडा नं.४ का वडाअध्यक्ष एवम् नगर प्रबक्ता गोविन्द पौडेल, वन समुहकी सल्लाहकार कविताा बस्नेत लगायतले मन्तव्य राखेका थिए । कनकाई सामुदायिक वन समूहकी सचिव एवम् कनकाई महिला वातावरण संरक्षण समूहकी अध्यक्ष मान्ता खरेलले स्वागत मन्तव्य राखेको कार्यक्रमको संचालन सामुदायिक वन समूहका कार्यालय सचिव नेत्र भट्टराईले गरेका थिए ।
