काठमाडौं । कोरोना भाइरस (कोभिड-१९)को संक्रमणका कारण नेपालमा थप एक जनाको मृत्यु भएको छ ।
पाल्पाको मिसन अस्पतालको आइसोलेसन कक्षमा ज्यान गुमाएका पूर्वखोला गाँउपालिका-१ सिलुवाका ४५ बर्षीय पुरुषमा कोरोना संक्रमण पुष्टि भएको हो ।
उनी १८ गते मात्र भारतबाट आएका थिए र, शम्भु माविको क्वारेन्टिनमा बसेका थिए । स्वास्थ्यमा समस्या भएपछि उनलाई १९ गते अस्पताल लगिएको थियो । त्यही दिन स्वाब संकलन गरेर परीक्षणका लागि भैरहवास्थित प्रादेशिक प्रयोगशालामा पठाइएको थियो । २० गते उनको निधन भयो ।
त्यसको दुई दिनपछि बिहीबार कोरोना परीक्षण रिपोर्ट पोजेटिभ आएको छ ।
स्वास्थ्य तथा जनसंख्या मन्त्रालयले उनको कारोना संक्रमणका कारण मृत्यु भएको घोषणा गरेको छ । यससँगै कोरोना संक्रमणका कारण ज्यान गुमाउनेको संख्या १० पुगेको छ ।
जिल्ला प्रशासन कार्यालय पाल्पाका सूचना अधिकारी यज्ञश्वर पन्थीका अनुसार कोरोनाको आशंका गरिएका कारण अहिलेसम्म उनको शव व्यवस्थापन गरिएको थिएन ।
कोरोना पोजेटिभ आएसँगै शव व्यवस्थापनको तयारी भइरहेको छ ।अनलाइनखबर
