तीर्थराज खरेल
सुरुङ्गा \ स्वरोजगारका लागि कनकाई नगरका एकल महिलालाई मौरीगोला हस्तान्तरण गरिएको छ ।
सुरुङ्गामा आयोजित एक विशेष कार्यक्रममा कनकाई नगरका उपप्रमुख मञ्जु प्रसाई, वार्ड नं. १ का कार्यवाहक अध्यक्ष देवीप्रसाद अधिकारी, वार्ड नं. २ अध्यक्ष पर्शुराम गिरी, वार्ड नं. ३ अध्यक्ष रुद्रप्रसाद चिमरिया र वार्ड नं. ४ का अध्यक्ष गोविन्दप्रसाद पौडेलले २० वटा मौरीगोला हस्तान्तरण गरे ।
गत वर्ष वार्ड नं. ३ को बजेटबाट १ लाख ५० हजार रुपैयाँको सहयोगमा ६ वटा र वार्ड नं. ४ को ३० हजार रुपैयाँको सहयोगमा २ वटा मौरीगोला किनी एकल महिलालाई हस्तान्तरण गरिएको थियो भने आ.व. २०७५\०७६ को बजेटबाट वार्ड नं. १ को ५० हजार रुपैयाँको सहयोगमा ३ वटा, वार्ड नं. २ को १ लाख रुपैयाँको सहयोगमा ५ वटा, वार्ड नं. ३ को १ लाख २० हजार रुपैयाँको सहयोगमा ९ वटा र वार्ड नं. ४ को ५० हजार रुपैयाँको सहयोगमा ३ वटा गरी दुवै वर्षको गरी जम्मा २८ वटा घार एकल महिलालाई हस्तान्तरण गरिएको एकल महिला समूह वार्ड नं. २ की अध्यक्ष राधा बजगाईले जानकारी दिइन् ।
कार्यक्रमको अध्यक्षता एकल महिला समूह नगर अध्यक्ष मीरा भट्टराईको अध्यक्षतामा भएको थियो । नगर उपप्रमुख मञ्जु प्रसाईंको प्रमुख आतिथ्य रहेको मौरीगोला हस्तान्तरण कार्यक्रममा वार्ड नं. १ का कार्यवाहक अध्यक्ष देवीप्रसाद अधिकारी, वार्ड नं. २ का अध्यक्ष परशुराम गिरी, वार्ड नं. ३ का अध्यक्ष रुद्रप्रसाद चिमरिया, वार्ड नं. ४ का अध्यक्ष गोविन्दप्रसाद पौडेल, कार्यपालिका सदस्यद्वय सीता अधिकारी र कृष्णमाया भुजेल, वार्ड सदस्य घनश्याम मैनाली लगायतले मन्तव्य राखेका थिए ।
वक्ताहरुले एकल महिला अपहेलित भएर बस्न नहुने, विषादि प्रयोग गरी बालीनाली नलगाउने, सीपमूलक आयआर्जनका काममा लाग्नुपर्ने, मह उत्पादन गरी बजारीकरण गर्नुपर्ने लगायतका सुझावहरु राखेका थिए । एपिस मेलिफेरा र एपिस सेरेना जातका मौरीहरु झापाको हावापानीमा मिल्ने भएकाले सोही जातका मौरी खरिद गरिएको छ । परागसेचनमा महत्वपूर्ण भूमिका खेल्ने मौरीले कृषिमा ठूलो सहयोग पु¥याउने र महमा औषधीय गुण हुने भएकाले सबै कृषकले मौरीपालन व्यवसाय सञ्चालन गर्नुपर्नेमा वक्ताहरुले जोड दिएका थिए ।
कनकाई नगरका एकल महिलाहरुले एक चरणको ३ दिने मौरीपालन सम्बन्धी तालिम लिइसकेको बताइएको छ । उक्त घारहरु देवीमाया दाहाल र तीर्थराज दाहालद्वारा शिवसताक्षी नगरपालिका दुधेमा सञ्चालित शिवसतासी मौरीपालन केन्द्रबाट खरिद गरिएको बताइएको छ । उक्त मौरीगोला हस्तान्तरण कार्यक्रममा एकल महिला वार्ड नं. १ का अध्यक्ष सूर्यकुमारी जोगी, वार्ड नं. ४ का अध्यक्ष राधादेवी कोइराला, कनककाई नगरपालिका वार्ड सदस्यहरु छबि थपलिया, युवराज चम्लागाईं, गीता सुजी, रोशन सुबेदी लगायतको आतिथ्य रहेको थियो । एकल महिला वार्ड नं. ३ का अध्यक्ष शोभा आचार्यको स्वागत मन्तव्य रहेको कार्यक्रमको सञ्चालन एकल महिला समूह नगर समितिकी सचिव रीता उप्रेतीले गरेकी थिइन् ।
