राम निरौला,
कनकाई खबर / कोरोनाको कहरसँगै कनकाई नगरपालिकाले व्यवस्थापना गरेको कनकाई बहुमुखी क्याम्पसको क्वारेन्टिनमा रहेका ३४ जना नगरबासीको पिसिआर रिपोर्ट नेगेटिभ आएपछि उनीहरुलाई विदाई गरिएको छ ।
विदाई भएका सवैलाई कनकाई नगरपालिकाको सवारी साधन साथै नगर प्रमुख पोखरेलको निजी सवारी साधनवाट आवश्यक सुरक्षा अपनाउँदै क्वारेन्टिनबासीलाई घर घरमै पुर्याइएको छ । नगर प्रमुख पोखरेलले आँफै गाडी चलाएर नगरबासीलाई गन्तव्य सम्म पुर्याउँनकालागि देखाएको सक्रियताप्रति क्वारेन्टिनबासीले खुशी व्यक्त गरेका छन् ।
कनकाई क्याम्पसको क्वारेन्टिनमा रहेका ५६ जना मध्ये ३४ जना साथै अग्र भागमा रहेर संचार क्षेत्रमा काम गर्ने संचारकर्मीहरु र केही स्थानीय गरी ४१ जनाको स्वब संकलन गरेर पिसिआर विधिवाट कोरोना परिक्षण गरिएको थियो । दुई हप्ता अघिदेखि क्वारेन्टिनमा बस्दै आएका मध्ये ३४ जनाको पिसिआर रिपोर्ट नेगेटिभ आएका नगरबासीहरुलाई स्थानीय सरकार कनकाई नगरपालिकाका प्रमुख राजेन्द्र पोखरेल, उपप्रमुख मन्जु प्रसाईँ, स्थानीय कनकाई ३ का वडाअध्यक्ष रुद्रप्रसाद चिमरीया साथै इलाका प्रहरी कार्यालय सुरुङ्गाका प्रमुख पदमसुन्दर लिम्बू लगायतले विदाई गरेका हुन् ।
क्वारेन्टिनबासीलाई विदाईका क्रममा नगर प्रमुख पोखरेलले आवश्यक सुरक्षा अपनाउँदै कनकाई नगरको विकास निर्माणका काममा सक्रियता देखाउँन अनुरोध गरेका छन् । समाज परिवर्तनमा युवाहरुको भूमिका महत्वपूर्ण रहने भन्दै नगरप्रमुख पोखरेलले क्वारेन्टिनवाट विदाई भएका युवाहरुलाई बाँकी समय उपलव्धीमूलक बनाउँन समेत अनुरोध गरेका छन् । क्वारेन्टिन बसाईपछि विदा भएर गएका युवाहरुलाई आँफू सुरक्षित भएर स्वस्थ रहन साथै खानपानमा विशेष ध्यान दिन ईलाका प्रहरी कार्यालय सुरुङ्गाका प्रमुख पदमसुन्दर लिम्बूले अनुरोध गरेका छन् ।
गाउँघर र परिवारका साथमा रहँदा पनि आँफूले सिकेका सिपको सदुपयोग गर्दै आँफूलाई सिर्जनशिल बनाएर जीवन उपयोगी बनाउँनु पर्ने तर्फ सुरुङ्गाका प्रहरी प्रमुख लिम्बूले क्वारेन्टिनबासीलाई अनुरोध गरेका छन् । कनकाई नगरका विभिन्न क्वारेन्टिनमा रहेका मध्ये हाल सम्ममा कनकाई नगरका संचारकर्मी सहित १५० जनाको स्वब संकलन गरीएकोमा ९४ जनाको पिसिआर रिपोर्ट नेगेटिभ आइसकेको क्वारेन्टिन फोकल पर्सन लक्ष्मी अधिकारीले जानकारी दिएका छन् ।
