कनकाई खबर /कनकाई नगरका विभिन्न क्वारेन्टिनमा राखिएका मानिसहरुको पिसिआर विधिबाट कोरोना परिक्षणकालागि स्वाब संकलनको कार्यलाई तिब्र रुपमा अघि बढाइएको छ ।
क्वारेन्टिनमा बसेका मानिसहरुको निश्चित अवधि पुरा भएपछि यसअघि दुई चरणमा भएको ५३ जनाको स्वाब परिक्षणको रिपोर्ट नेगेटिभ आएपछि पुनः नगरका पत्रकारसहितको स्वाब संकलन गरिएको नगरका स्वास्थ्य प्रमुख ब्रजेश मेहताले बताएका छन् ।
आज विहिवार कनकाई नगरमा क्रियाशिल रहेका चारजना पत्रकारसहित कनकाई बहुमुखी क्याम्पसको क्वारेन्टिनबासी गरी ४१ जनाको स्वाब संकलन भएको बताइएको छ ।
प्रारम्भिक चरणमा आरडिटी विधिवाट ७८ जनाको स्वास्थ्य परिक्षण गरिएको भएपनि यस विधिवाट गरिएको प्रयोग त्यति भरपर्दो नभएपछि पछिल्लो समय पिसिआर विधिवाट स्वास्थ्य परिक्षण गर्न थालिएको बताइएको छ ।
कनकाई नगर क्षेत्रमा कोरोना संक्रमणका विषयलाई लिएर स्थानीयबासीले विभिन्न आशंका गर्दै सामाजिक संजालहरु मार्फत गरेको भ्रमप्रति कनकाई नगरपालिकाको ध्यान आकर्षण भएको भन्दै कनकाई नगरपालिकाका प्रमुख राजेन्द्रकुमार पोखरेलले त्यस्ता भ्रमको पछि नलाग्न समेत नगरबासीलाई अनुरोध गरेका छन् ।
