कनकाई खबर / कोरोनाको कहरसँगै लकडाउन थप हुँदै जाँदा खाद्य सामाग्री लगायत बजारमा रहेका दैनिक उपभोग्य सामाग्रीमा कालो बजारी हुन सक्ने भन्दै कनकाई नगरपालिकाले बजार अनुगमनलाई तिब्रता दिएको छ ।
सामाजिक दुरी कायम राख्दै नगर उपप्रमुख मन्जु प्रसाईँको नेतृत्व रहेको अनुगमन टोलीमा प्रमुख प्रशासकीय अधिकृत रुद्रप्रसाद न्यौपाने, प्रशासकीय अधिकृत विवेक भण्डारी, कर्मचारी कमला विश्वकर्मा, कनकाई उद्योग वाणिज्य संघका अध्यक्ष त्रिलोचन चिमरीया, बजार व्यवस्थापन समितिका सदस्य अनिल गोयल, ईलाका प्रहरी कार्यालय सुरुङ्गाका प्रमुख पदमसुन्दर लिम्बूसहित सुरक्षाकर्मी, संचारकर्मीको उपस्थिती रहेको बताइएको छ । कनकाई नगर भित्र रहेका सुरुङ्गा, लक्ष्मीपुर र घैलाडुवा बजार क्षेत्रको अनुगमन गरिएको हो ।
अनुगमनका क्रममा मूल्य सुचि, साइनबोर्ड, व्यवसाय दर्ता साथै नविकरण, नापतौलको प्रमाण, प्याकेजीङ गरिएका खाद्य सामाग्रीको म्याद भए नभएको, स्थायी लेखा नम्बरसहित भ्याट दर्ता, बिक्रि बिल दिने प्रक्रिया, मासु बजारको अवस्था, ग्याँसको तौल मूल्य, खरिद बिल लगायतका विषयमा स्थलगत अनुगमन गरिएको नगर उपप्रमुख मन्जु प्रसाईँले बताएकी छन् ।
नगरपालिकावाट भएको बजार अनुगमनमा टोलीकी संयोजक समेत रहेकी उपप्रमुख प्रसाईँले अनुगमनका क्रममा समस्या देखिएका केही व्यवसायीहरुलाई सुधार गरेर जान निर्देशन दिएको बताएकी छन् । पटक पटक दिइएका निर्देशनहरु पुनः अनुगमन गर्दा पालना नभएको पाइएमा प्रचलित कानुन बमोजीम कडा कार्वाही गरिने नगर उपप्रमुख प्रसार्इँले जानकारी दिएकी छन् । लकडाउनका कारण केही समय हप्तामा तीन दिन विहान ८ देखि ११ बजे सम्म अतिआवश्यक सामाग्रीकालागि बजार खुल्दै आएको भएपनि बजार खोल्ने समय अति नै छोटो भएपछि बजार क्षेत्रमा अत्यधीक भिडभाड बढ्न थालेका कारण बैशाख २७ गतेदेखि प्रत्येक दिन विहान ७ः३० बजेदेखि ११ः३० बजे सम्म ४ घण्टाकालागि बजार खुल्ला हुन थालेको बताइएको छ ।
