Most Viewed

Categories

लकडाउनको सदुपयोग गर्दै ग्रामिण क्षेत्रका युवा तरकारी खेतीमा (भिडियो सहित)

राम निरौला,

कनकाई खबर / कोरोना भाइरसको रोकथाम तथा नियन्त्रणकालागि सरकारले गरेको लकडाउनको समयलाई सदुपयोग गर्दै ग्रामिण क्षेत्रका युवा तरकारी खेतीमा लागेका छन् ।

झापाको कनकाई नगरपालिका ७ दुर्गापुरका युवा दिपक पोखरेल यति बेला सामाजिक दुरी कायम राख्दै आफ्नो व्यक्तिगत लगानीमा व्यवसायीक तरकारी खेती तर्फ लागेका छन् । दुई महिना अघिदेखि अन्य ६ जनालाई रोजगार समेत दिँदै आएका पोखरेलको तरकारी खेतीमा हाल करेला, काँक्रा, घिरौला, भिन्डी, बैगुन र टमाटरको उत्पादन हुन थालेको छ । हरेक दिन स्थानीयबासीको घर दैलोमा ताजा तरकारी पुर्याउँने कार्यमा व्यस्त देखिने पोखरेल स्थानीय युवाहरु माझमा राम्रो उदाहरण बनेका छन् ।

विश्वव्यापी महामारीका रुपमा फैलिएको कोरोना भाइरसको सामान्य चर्चा हुन थालेकै समयवाट आफ्नो एक विगाहा पाँच कठ्ठा जमिनमा तरकारी खेती सुरु गरेका पोखरेल हाल व्यवसायीक रुपमा तरकारी उत्पादन गर्ने एक सफल कृषकको रुपमा परिचित हुन थालेका छन् । आसपासका स्थानीयबासीले बारीबाटै तरकारी खरिद गर्दै आएपनि कोरोनाका कारण बन्दाबन्दी भएपछि बर्तमान असहज परिस्थितीमा उत्पादन भएका तरकारी पोखरेलले आँफै पनि घर दैलोमा पुर्याउँने गरेका छन् । निजी लगानीमा तरकारी खेती गर्न थालेका पोखरेलले अन्य तीन विगाहा जमिन भाडामा लिएर त्यहाँ बोडी, मकै र घाँस लगाएका छन् । विभिन्न किटनाशक औषधी साथै रासायनिक मलका कारण दिनप्रतिदिन अम्लियपन बढ्दै गएको कारण रुखो बन्दै गएको जमिनमा पोेखरेलले अग्र्यानिक पद्धतीबाट तरकारी खेती गर्ने प्रयास गरेका छन् ।

तरकारी खेती गरेको ठाउँमा जमिन बाहेक हाल सम्ममा ३ लाख ५० हजार खर्च भइसकेको पोखरेल बताउँछन् । प्रारम्भिक चरणमा नै सव्जीमा देखिएको राम्रो उत्पादनले आशा जगाएको भन्दै पोखरेलले स्वदेशमै केही गर्ने जोश जाँगरका साथ आँफू अघि बढेको जानकारी दिएका छन् । विगत एक दशक अघिदेखि स्थानीय स्तरमा घर घडेरीको किनबेचमा लागेका पोखरेलले १४ वर्ष अघि बैदेशिक रोजगारका क्रममा साउदी र कतारमा दुई वर्षको अनुभव बटुलेका छन् । विदेशमा श्रम गरेको आठ घण्टाको समय स्वदेशमै खर्च गर्ने हो भने परिवारका साथ ठूलो उपलब्धी हात पर्न सक्ने भन्दै आफ्नै भूमिमा भविष्य खोज्नकालागि पोखरेलले सम्पूर्ण युवाहरुलाई अनुरोध गरेका छन् ।

परम्परागत रुपमा चलिरहेको कृषि प्रणालीमा केही सुधार गर्न सकेमा स्थानीय युवाहरुलाई स्वदेशमै आत्मनिर्भर बनाउँन सकिने कुरामा आँफूले अनुभव बटुलेको पोखरेल बताउँछन् । पछिल्लो समय जनप्रतिनिधीहरुले स्थानीय तहको नेतृत्व सम्हाले यता कृषि क्षेत्रमा पनि केही सुधारको संकेत देखिएपछि अधिकांश युवाहरु कृषि व्यवसायमा आकर्षित हुन थालेका छन् । सोही क्रममा जीवनमै पहिलो पटक कृषिमा केही परिवर्तन ल्याउँने उद्येश्यका साथ अघि बढेका युवा दिपक पोखरेल जस्तै अन्य व्यवसायीक रुपमा लगानी भएका उत्पादनले कोरोना भाइरसका कारण उचित बजार पाउँन नसक्ने होकी भन्ने चिन्ताले यतिबेल कृषकहरुलाई पिरोल्न थालेको छ ।

Facebook Comments

    Leave Your Comment

    Your email address will not be published.*