झापा \ आइतबार कोरोना संक्रमित फेला परेपछि सोमबारदेखि बाह्रदशी गाउँपालिकालाई सिल गरिएको छ ।
बाह्रदशी–४ निवासी एक ५० वर्षीय व्यक्तिलाई कोरोना संक्रमण पुष्टि भएसँगै गाउँपालिकाले उच्च सर्तकता अपनाउँदै गाउँपालिकालाई सिल गरिएको हो । गाउँपालिका अध्यक्ष खड्गप्रसाद राजवंशीको अध्यक्षतामा बसेको बैठकले सोमबार गाउँपालिकालाई सिल गर्ने निर्णय गरेको छ ।
सांसद् राजेन्द्र लिङ्देनको समेत सहभागितामा सोमबार गाउँपालिकामा सम्पन्न बैठकले गाउँपालिकाको पूर्वतर्फ कञ्चनगढ, पश्चिममा विरिङ खोला, उत्तरमा पाख्रिवास र दक्षिणमा राधा नगर सम्मको भाग सिल गर्ने निर्णय गरेको गाउँपालिकाले जनाउको छ । गाउँपालिकाका अध्यक्ष राजवंशी, उपाध्यक्ष रत्नाकुमारी राजवंशी, वडा नम्वर ३, ४ र ५ नम्वर वडाका वडाअध्यक्षहरु, नेपाल रेडक्रस सोसाइटीका पदाधिकारी सदस्य रहने गरी ९ जनाको समिति गठन गरिएको छ ।
भारतको दिल्ली स्थित मुस्लिमको धार्मिक सभामा भाग लिएर घर फर्किएको ४७ दिनपछि उनमा कोरोना संक्रमणको पुष्टि भएको थियो । आइतबार विराटनगरको कोभिड अस्पतालमा गरिएको पीसीआर परीक्षणका क्रममा ती व्यक्तिमा कोरोना संक्रमणको पुष्टि भएको थियो । मार्च ११ मा घर फर्किएका उनको यसअघि दुई पटक आरडीटी परीक्षण गर्दा पनि कोरोना संक्रमण देखिएको थिएन ।
उनको गत बैशाख ४ मा पहिलो पटक र शनिवार मात्रै दोस्रो पटक आरडीटी परीक्षण गरिएको थियो । झापामा कोरोना संक्रमितको संख्या २ पुगेको छ । यसअघि दमक–३ नम्बर वडा निवासी ६२ वर्षीय वृद्वमा पनि कोरोना संक्रमण फेला परेको थियो । (श्रोत पूर्वाञ्चल)
