राम निरौला,
कनकाई खबर \ विश्वव्यापी महामारीका रुपमा रहेको कोरोना भाइरसको संक्रमण नेपालमा फैलिन नदिन सरकारले गरेको लकडाउनको अवधि थप भएपछि झापा क्षेत्र नं.४ का प्रतिनिधी सभा सदस्य एलपी साँवा (लिम्बू) यतिबेला आफ्ना नागरिकको अवस्थाका बारेमा जानकारी लिन आफ्नो निर्वाचन क्षेत्रको अनुगमनमा सक्रिय देखिन्छन् ।
( गौरीगन्ज – १ महाभारास्थित भारतसँग सीमा क्षेत्र जोडिएको कुन्जिबारी बोर्डर आउट पोस्ट्मा )
समृद्ध नेपाल सुखी नेपालीको अभियानलाई सफल बनाउँने नेपाल सरकारको कार्ययोजनामा सहकार्य गर्दै आएका सांसद साँवा कोरोना संक्रमणको वर्तमान अवस्थामा जनताको जीउधनको सुरक्षाका निम्ति गम्भिर बनेका छन् । आफ्नो निर्वाचन क्षेत्रको विकास निर्माणका काममा सधैं चासो राख्दै आएका सांसद साँवा वर्तमान असहज परिस्थितीमा समेत जनताको स्वास्थ्यका निम्ति गम्भिर बनेका हुन् ।
कोरोना भाइरसका कारण नेपाल पनि उच्च जोखिममा परेपछि यसको न्युनिकरण तथा रोकथामकालागि काठमाण्डौवाट स्वास्थ्य सामाग्री लिएर आफ्नो निर्वाचन क्षेत्रमा आएका सांसद साँवाले कोरोनाको संक्रमणवाट बच्न निर्वाचन क्षेत्रका नागरिकलाई लकडाउनको पूर्ण रुपमा पालना गर्न अनुरोध गर्दै माक्स, सेनिटाइजर लगायतका स्वास्थ्य सामाग्री वितरण गरेका छन् ।
निर्वाचन क्षेत्र नं. ४ अन्तर्गतका कनकाई नगरपालिका, झापा गाँउपालिका, शिवसताक्षी नगरपालिका, गौरिगञ्ज गाउँपालिकाको वडा नम्बर १ र २ साथै गौरादह नगरपालिका वडा नम्बर ९ का लागि सांसद साँवाले मेडिकेटेड माक्स र सेनिटाइजर वितरण गरेका हुन् । सांसद साँवाले मंगलबार र बुधवार आफ्नो क्षेत्रमा रहेका पालिकाका प्रमुख साथै वडाका अध्यक्षहरुलाई स्वास्थ्य सामाग्री प्रदान गरेका छन् । दैनिक ज्यालादारी मजदुर साथै अति विपन्न परिवारलाई विहान बेलुकाको छाक टार्न नै समस्या हुने अवस्था भएका नागरिकको पहिचान गरी सांसद साँवाले दोस्रो चरणमा खाद्य सामाग्री समेत वितरण गर्ने बताएका छन् ।
( भारतीय सिमा क्षेत्रमा लकडाउनमा ब्यबस्थापन गरिएको सुरक्षा प्रबन्धबारे अवलोकन )
सांसद् साँवाले आफ्नो निर्वाचन क्षेत्र अन्तर्गतका स्थानीय तहहरु कनकाई र शिवसताक्षी नगरपालिका साथै झापा गाउँपालिकामा रहेको कोरोना बिपत राहत कोषमा समान रुपले आफ्नो मासिक तलब बापतको रकमवाट रु.२५ हजारका दरले रकम हस्तान्तरण गरेको सांसद साँवाका स्वकीय सचिव सिकिन पासवानले बताएका छन् । उनले आफ्नो क्षेत्रमा भएका २८ वटा वडाहरुमा प्रति वडा एक हजारका दरले सम्वन्धित पालिका मार्फत मेडिकेटेड माक्स वितरण गर्नकालागि कुल ३० हजार माक्स र सेनेटाइजर क्षेत्र नं.४का पालिका प्रमुखहरुलाई हस्तान्तरण गरीसकेको बताइएको छ ।
सांसद साँवाले यसअघि संघीय सरकारले स्थापना गरेको कोरोना राहत कोषमा आँफूले सांसद सचिवालयबाट पाउने एक महिनाको तलव सुबिधा जम्मा गरेका थिए ।
