झापा \ विश्वव्यापी महामारीको रुपमा फैलिएको कोरोना भाइरसको रोकथाम तथा नियन्त्रणकालागि सवैजना होमक्वारेन्टाइनमा रहेको वर्तमान अवस्थामा वन कार्यालको बिना अनुमति राजमार्गका हरिया रुख कटान भएका छन ।
बन्दा बन्दीको समयमा कनकाई नगर प्रमुख राजेन्द्र पोखरेलको आदेशमा पुर्व पश्चिम राजमार्ग अन्तर्गत कनकाई ७ स्थित दुर्गापुर सडक खण्डका ४ वटा हरिया रुख कटान भएको स्थानीय बासीले बताए । दुर्गापुर बजार पश्चिम राजमार्गको छेउमा नगर प्रमुख पोखरेलको निवास रहेको छ । हावाहुरीले घर नजिकै ठुला ठुला रुख ढलेर मानवीय र भौतिक दुवै क्षति हुन सक्ने भन्दै पोखरेलले दिएको आदेश अनुसार रुख कटान भएको कटान गर्ने मजदुरले बताएका छन् ।
नगर प्रमुख पोखरेलले आफ्नो घर छेउको सडक क्षेत्रका ७ वटा मसला जातका रुख काट्न मजदुरलाई अह्राएका थिए । तर सडक डिभिजन कार्यालय दमक र जिल्ला बन कार्यालय झापाले रुख कटान भएको थाहा पाएपछी कटान भएको स्थलमा आएर रोकेका थिए । बनको टोली कटान भएको ठाउँमा आईपुग्दा ४ वटा मसला जातका रुख ढलिसेका थिए ।
सार्वजनिक स्थलमा रहेका हरिया रुख कटान गर्नु परेमा सम्बन्धित निकायको अख्तियारी लिनुपर्ने कानुनी प्रावधान रहेको प्रष्ट पार्दै डिभिजन वन कार्यालय झापाका प्रमुख बिष्णुलाल घिमिरेले कनकाई नगर प्रमुखलाई रुख काट्न वन कार्यालले अख्तियारी नदिएको बताए । नगर प्रमुखले घर नजिकैका रुख काट्नकालागि मौखिक रुपमा कुरा राखेको भएपनि कागजी रुपमा प्रक्रिया अघि नबढेको जानकारी दिँदै डिभिजन वनका प्रमुख घिमिरेले एकैचोटी रुख काटेको मात्र जानकारी आएको बताएका छन् ।
सडकका रुख काट्न सडक विभाग र बन कार्यालय दुवैबाट अधिकार लिनु पर्छ । मानवीय क्षति हुन सक्ने ठाँउमा तत्काल रुख हटाउनु पर्ने भएमा बन कार्यालयबाट कटान आदेश लिएपछी मात्र कटान छुट हुन्छ । तर लिखित निवेदनवाट माग समेत नगरी मौखिक जानकारीका आधारमा रुख कटान गर्नुले नगर प्रमुखले राम्रो काम गर्न खोजेको भएपनि प्रक्रिया गलत भएको स्थानीयवासी बताउँछन् ।
रुख कटानका विषयमा नगरको कार्यपालिका वोर्डले निर्णय गरेको नगर प्रमुख पोखरेलले बताए । तर कनकाई नगरपालिकाको नगर कार्यपालिका वोर्डमा रुख कटानका विषयमा कुनै पनि लिपीबद्ध निर्णय नभएको एक कार्यपालिका सदस्यले बताएका छन । ‘रुखका हाँगा हटाउने विषयमा कुरा उठेको हो, निर्णय लेखिएको छैन,’ ती सदस्यले भने । राजमार्गका रुख काटिएको विषयलाई लिएर केही संचार माध्यम साथै सामाजिक संजालहरुमा समाचार सार्वजनिक भएपछि कार्यपालिका बैठकको निर्णयकालागि पालिका सदस्यहरुसँग हार गुहार हुन थालेको ती कार्यपालिका सदस्यले जानकारी दिएका छन् । स्थानीय तहको नेतृत्व गरिरहेका कतिपय सरकार प्रमुखहरुले धेरै काम कुराहरु गर्न खोजेको भएपनि आफ्नो अधिकार क्षेत्र कति हो भन्ने कुरा नबुझेका कारणले पनि स्थानीय सरकार पटक पटक विवादमा आउँने गरेको बताइएको छ ।
यसै सन्दर्भमा रुख कटानका विषयमा स्थानीय स्तरमा आलोचना सहनु परेपनि तत्कालको अप्ठ्यारो अवस्थालाई सहज बनाउँन निस्वार्थ ढङ्गले आँफू अघि बढेको नगर प्रमुख पोखरेलले जानकारी दिएका छन् । हावा हुरीको पनि समय आएकाले रुखका कारण विधुतीय तारमा हुन सक्ने क्षतिलाई मध्य नजर गर्दै कटान गरिएका रुख सम्वन्धित निकायलाई जिम्मा लगाउँने योजना अनुरुप रुखका सवै गोलियाहरु हाल कनकाई सव डिभिजन कार्यालयमा सुरक्षित रहेको वताइएको छ ।
