राम निरौला,
कनकाई खबर \ कोरोना महामारीका कारण मुलुकभरी नै लकडाउन भएको वर्तमान अवस्थामा कनकाई नगरपालिकाले आफ्ना नागरिकलाई सहयोग गर्न बनाएको कोरोना राहत कोषमा समाजसेवी रामबाबु महर्जन र श्रीमति लक्ष्मी श्रेष्ठ महर्जनले २५हजार एक सय एक रुपैँया सहयोग गरेका छन् । महर्जनले कनकाई नगरपालिकामा आँफै गएर नगरप्रमुख राजेन्द्र पोखरेललाई नगद हस्तान्तरण गरेका हुन् ।
कनकाई ३ सुरुङ्गा निवासी ७२ बर्षिय दाता रामबाबु महर्जन श्री महर्जन टायल उद्योग साथै जोजोलोप्पा कृतिम जलाशय घरका संचालक हुन् । स्थानीयस्तरका विभिन्न सामाजिक संघसंस्थाहरुको नेतृत्व तहमा रहेर सफल जिम्मेवारी सम्हालिसकेका महर्जन आफ्नो व्यथालाई कथा बनाएर समाजभित्रको विकृति र विसंगति विरुद्ध कलम चलाउँने एक साहित्यकारका रुपमा समेत परिचित छन् ।
परिवारका साथ कृतिम जलाशय घरमा विभिन्न किसिमका फूलको व्यवस्थापन साथै कलात्मक शैलीमा सजावटका सामाग्री निर्माण गर्दै आएका महर्जन समाज परिवर्तनका निम्ति सधैं क्रियाशिल रहने एक सामाजिक अभियन्ता समेत हुन् । चाडपर्व साथै जन्मदिनका अवसरमा गाउँघरमा हुने फजुल खर्चलाई मानवीय सेवामा सदुपयोग गर्न सन्देश दिँदै महर्जनले बिपन्न परिवारलाई थोरै भएपनि राहत सामाग्री उपलव्ध गराउँने उद्येश्यले स्थानीय सरकारका रुपमा रहेको कनकाई नगरपालिकाले स्थापना गरेको विपत कोषमा जम्मा हुने गरी आँफूले आर्थिक सहयोग गरेको जानकारी दिएका छन् ।
स्थानीय सरकारका रुपमा रहेको कनकाई नगरपालिकाले नगरका सवै वडा र टोलमा रहेका अतिविपन्न परिवारको सुक्ष्म रुपमा अध्ययन गरी एकद्वार प्रणालीका आधारमा खाद्य सामाग्री वितरण गर्ने निती लिएपछि दाताले नगरपालिकाको मातहतमा रहेर नगद तथा जिन्सी सहयोग गर्दै आएको वताइएको छ ।
विश्वव्यापी महामारीको रुपमा फैलिएको कोरोना भाइरसको न्युनिकरणकालागि सरकारले गरेको लकडाउनको अवधि थप भएपछि दैनिक ज्यालादारी मजदुर साथै अति विपन्न परिवारलाई विहान बेलुकाको छाक टार्न नै समस्या हुने अवस्था आएपछि आफ्नै गाउँघरमा रहेका विपन्न परिवारकालागि खाद्य सामाग्री साथै औषधि उपचारको समेत व्यवस्थापनमा सहज होस् भनेर स्थानीय सरकार मार्फत आँफूले सानो सहयोग गरेको कनकाई खबरलाई महर्जनले जानकारी दिएका छन् । व्यवसाय होस् या सामाजिक क्षेत्र, आफ्नो छुट्टै पहिचान बनाएका महर्जनले यस अघि पनि विभिन्न समयमा आएका प्राकृतिक विपत्तीमा समेत आफ्नो क्षेत्रमा महत्वपूर्ण सहयोग गर्दै आएका छन् ।
सहयोग रकम ग्रहण गर्दै कनकाई नगरका प्रमुख राजेन्द्र पोखरेलले विपतको यो घडीमा दातावाट विपन्न परिवारकालागि भएको सहयोग ज्यादै महत्वपूर्ण भएको भन्दै स्थानीय सरकारका तर्फवाट महर्जन परिवारको पवित्र कार्यको प्रशंसा गरेका छन् । नगर प्रमुख पोखरेलले विश्वभरी नै कोरोनाको महामारी फैलिएको वर्तमान अवस्थामा नेपालमा यसको न्युनिकरणकालागि सरकारले जारी गरेको निर्देशनलाई पालना गर्न समेत सम्पूर्ण नगरवासीहरुलाई अनुरोध गरेका छन् ।
