झापा गाउँपालिका \ झापा गाउँपालिकाले कोरोना महामारीबाट आफ्ना गाउँपालिकाका नागरिकलाई सहयोग गर्न बनाएको कोरोना राहत कोषमा गाउँपालिकामा कार्यरत कर्मचारीहरुले ५५ हजार ४सय ९८ रुपैंयाँ सहयोग गरेका छन् ।
विश्वव्यापी महामारीको रुपमा रहेको कोरोना भइरसको न्युनीकरणकालागि सरकारले गरेको लकडाउनका समयमा दैनिक ज्यालादारी मजदुर र अतिविपन्न परिवारकालागि अतिआवश्यकीय खाद्य सामाग्री उपलव्ध गराउँने उद्येश्यले स्थापना गरेको कोषमा गाउँपालिकाका कर्मचारीहरुले सहयोग गरेका हुन् । गाउँपालिकामा कार्यरत ५२ जना कर्मचारीहरुले आआफ्नो तलववाट स्तरअनुसारको रकम संकलन गरेर गाउँपालिकाका अध्यक्ष जयनारायण शाहलाई प्रदान गरेका हुन् ।
कर्मचारीका तर्फबाट सहयोग रकम गाउँपालिकाको कार्यालयमै उपस्थित भएर प्रमुख प्रशासकीय अधिकृत जीवन निरौला र लेखा अधिकृत लक्ष्मी खतिवडाले गाउँपालिकाका अध्यक्ष शाहलाई हस्तान्तरण गरेका हुन् । हस्तान्तरणको समयमा कार्यालयका कर्मचारीहरु गौरब संग्रौला, अभिषेक दास, बाबुराम निरौला, दिपेन्द्र न्यौपाने लगायतको उपस्थिती रहेको थियो । रकम हस्तान्तरण गर्दै गाउँबासीलाई यो विपदको घडीमा केही राहत होस् भनी कर्मचारीहरुले यस्तो सहयोग गरेको प्रमुख प्रशासकीय अधिकृत निरौलाले बताए ।
सहयोग रकममा अधिकृत स्तरका कर्मचारीहरुले आफ्नो दुई दिनको तलब साथै सहायक स्तरका कर्मचारीहरुले एक दिनको तलब प्रदान गरेका हुन् । गाउँपालीकाको कोरोना राहत कोषमा रकम जम्मा हुने क्रम जारी छ भने गाउँपालिकाका गरिब तथा अति विपन्न परिवारलाई खाद्य सामाग्री वितरण कार्य सुरु भइसकेको वताइएको छ ।
यस महाविपत्तीमा गाउँपालिकाको राहत कोषमा सहयोग गर्न गाउँपालिकाले सम्पूर्ण संघ संस्था, उद्योगी, व्यपारी, व्यवसायी, स्वदेश तथा विदेशमा रहेका नेपाली दाजुभाइ, दिदीबहिनीसमक्ष अनुरोध समेत गरेको छ । सहयोग रकम प्रदान गर्न सहज होस् भन्ने उद्येश्यले झापा गाउँपालिकाले एनआईसी एशियाको झापा बजारमा रहेको शाखाबाट खोलीएको k2CA051251452406 नम्बरको खाता संचालनमा रहेको वताएको छ ।
