Most Viewed

Categories

कनकाई ७ मा खाद्य सामाग्री वितरण (भिडियो सहित)

कनकाई खबर /हाल दोहा कतारमा रहेका झापाको डाँगीवारी निवासी महेन्द्र चम्लगाईँ र उनकी श्रीमति कञ्चन ओली चम्लगाईँले कनकाई नगरपालिका वडा नं. ७ मा रहेका १ सय ७ परिवारकालागि उलव्ध गराएको अतिआवश्यकीय खाद्यसामाग्री वितरण गरिएको छ ।

 

विश्वव्यापी महामारीको रुपमा फैलिएको कोरोना भाइरसको न्युनिकरणकालागि सरकारले गरेको लकडाउनको अवधि थप भएपछि दैनिक ज्यालादारी मजदुर साथै अति विपन्न परिवारलाई विहान बेलुकाको छाक टार्न नै समस्या हुने अवस्था आएपछि चम्लगाईँ परिवारले खाद्य सामाग्री उपलव्ध गराएका हुन् । नेपाल कतार व्यवसायी संघको अध्यक्ष समेत रहेका चम्लगाईँ विभिन्न सामाजिक संघसंस्थामा समेत क्रियाशिल छन् । लामो समयदेखि वैदेशिक रोजगारीका क्रममा दोहा कतारमा रहेका चम्लगाईँले यस अघि विभिन्न समयमा आएका प्राकृतिक विपत्तीमा समेत आफ्नो नेपाली भूमिमा महत्वपूर्ण सहयोग गर्दै आएको वताइएको छ ।

  सहयोग सामाग्री हस्तान्तरण गर्दै कनकाई नगरका प्रमुख राजेन्द्र पोखरेलले विपतको यो घडीमा दाता चम्लगाईँवाट विपन्न परिवारकालागि भएको खाद्य सामाग्रीको सहयोग ज्यादै महत्वपूर्ण भएको भन्दै स्थानीय सरकारका तर्फवाट दाता परिवारको पवित्र कार्यको प्रशंसा गरेका छन् । नगर प्रमुख पोखरेलले विश्वभरी नै कोरोनाको महामारी फैलिएको वर्तमान अवस्थामा नेपालमा यसको न्युनिकरणकालागि सरकारले जारी गरेको निर्देशन विनाशर्त पालना गर्न सम्पूर्ण नगरवासीहरुलाई अनुरोध गरेका छन् ।

वर्तमान अवस्थामा देखा परेको विपतीमा समेत झापाका विभिन्न क्षेत्रमा राहत सामाग्रीको सहयोग गर्दै आएका चम्लगाईँ परिवारले उलव्ध गराएको खाद्य सामाग्री सुक्रवार उनीहरुका आफन्त सागर ओली र कनकाई नगरपालिकाका प्रमुख राजेन्द्रकुमार पोखरेलले कनकाई नगरको वडा नं. ७ का विपन्न परिवारलाई हस्तान्तरण गरेका हुन् । स्थानीय सरकारका रुपमा रहेको कनकाई नगरपालिकाले नगरका सवै वडा र टोलमा रहेका अतिविपन्न परिवारको सुक्ष्म रुपमा अध्ययन गरी एक द्वार प्रणालीका आधारमा खाद्य सामाग्री वितरण गर्ने निती लिएपछि दाताले नगरपालिकाको मातहतमा रहेर खाद्य सामाग्री वितरण गरेको वडा नं.७ का वडाअध्यक्ष लिलावहादुर कन्दङ्वाले वताएका छन् ।

   दाता चम्लगाईँले उपलव्ध गराएको नगद रु.९३ हजार ४ सय २८ रुपैंयासहित वडा समितिको विपद व्यवस्थापन कोषको रकम समेत गरी वडामा रहेका विपन्न परिवारलाई चामल, दाल, नुन, तेल, सव्जी लगायतका खाद्य सामाग्री वितरण गरीएको वडाअध्यक्ष कन्दङ्वाले जानकारी दिएका छन् ।वडा नं. ७ मा रहेका ११ वटै टोलमा वडाअध्यक्ष कन्दङ्वासहित जिल्ला समन्वय समिति झापाका सदस्य माराङ् हास्दा, वडा सदस्यहरु प्रकाश शिवाकोटी, गीता चौहान, नेकपा वडाअध्यक्ष देवीप्रसाद भट्टराई, नेपाली कांग्रेसका वडासभापति ईश्वरीप्रसाद शिवाकोटी, पत्रकार राम निरौला, टोल विकास संस्थाका पदाधिकारीहरु सहितको उपस्थितीमा खाद्य सामाग्री वितरण गरिएको हो ।

समाचारमा भएको भिडियो कनकाई खबरको युटुब च्यानलमा पनि हेर्न सकिने छ  ।

Facebook Comments

    Leave Your Comment

    Your email address will not be published.*