कनकाई खबर \ कोरोना भाइरसबाट बच्न झापाका एक समाजसेवी युवाले पत्रकारसहित सुरक्षाकर्मी र स्वास्थ्यकर्मीलाई पिपिई र मास्क प्रदान गरेका छन् ।
कनकाई नगरको सुरुङ्गा निवासी समाजसेवी युवा व्यक्तित्व तथा लायन्स क्लव एवम् सुरुङ्गा जेसीजका संस्थापक अध्यक्ष लीला चिमरियाले सहारा नेपाल(साकोस) सँग समन्वय गरी कनकाई नगर लगायत झापाका विभिन्न स्थानमा कार्यरत संचारकर्मी, सुरक्षाकर्मी र स्वास्थ्यकर्मीलाई पिपिई र मास्क प्रदान गरेका छन् । यसैक्रममा कनकाई नगरका क्रियाशिल पत्रकार रामप्रसाद निरौला सहित तीनजना पत्रकारलाई समेत जनही एक एक थान पिपिई र मास्क प्रदान गरेका छन् ।
यस क्षेत्रमा कोरोना विरुद्धको सचेतना अभियान, नियन्त्रण तथा रोकथामदेखि राहत वितरण सम्मका समाचार संकलनमा सुरुदेखिनै क्रियाशिल रहेका राष्ट्रिय समाचार समिति (रासस) झापाका सम्वाददाता, कनकाई खबर अनलाइन साथै साप्ताहिक पत्रिकाका सम्पादक साथै अन्य विभिन्न संचार माध्यममा समेत क्रियाशिल निरौलासहित नेपाल पत्रकार महासंघ झापाका सदस्य तथा गोरखापत्रका विर्तामोड सम्वाददाता लीलाराज झापाली , कनकाई अनलाईनका प्रधान सम्पादक केशव चापागाईँलाई एक एक थान पिपिई सहित मास्क प्रदान गरिएको हो ।
पत्रकारहरु जस्तोसुक्कै जोखिममा पनि समाचार संकलन र अतिआवश्यकीय सहयोग हस्तान्तरणमा जानैपर्ने बाध्यता भएकोले आँफुले सहारा नेपाल बचत तथा ऋण सहकारी संस्था लि. (साकोस) सँग समन्वय गरी यी सामाग्री वितरण गरेको चिमरियाले बताए । सहारा नेपालले आफ्नो सेवा क्षेत्र प्रदेश नं.१ का ६ वटा जिल्लामा खाद्य सामाग्री समेत वितरण गर्दै आएको छ । यसका साथै सहारा नेपालले स्वास्थ्यकर्मी, सुरक्षाकर्मीसहितलाई अतिआवश्यक पर्ने पिपिई समेत आफ्ना सेवा क्षेत्रमा वितरण गर्दै आएको वताइएको छ । सहारा नेपाल(साकोस)सँग समन्वय गरेर समाजसेवी चिमरीयाले जिल्ला प्रहरी कार्यालय झापा, ईलाका प्रहरी कार्यालय विर्तामोड, सुरुङ्गा, झिलझिले, प्रहरी चौकी माइधार साथै ट्राफिक प्रहरी विर्तामोड, सुरुङ्गा, झिलझिले लगायत जिल्ला भरका महत्वपूर्ण प्रहरी, ट्राफिक प्रहरी र स्वास्थ्य कर्मीलाई समेत पिपिई प्रदान गरीसकेको बताएका छन् ।
कोरोना भाइरसको संक्रमण, नियन्त्रण र रोकथामका विषयमा सरकारको अभियानलाई सहयोग गर्न आफ्नो तर्फवाट क्रियाशिल रहेका चिमरीयाले वर्तमान अवस्थामा सरकारले गरेको लकडाउनका कारण विहान बेलुका हातमुख जोर्न नै समस्यामा पर्ने अति विपन्न परिवार साथै मजदुरहरुकालागि समेत आवश्यक खाद्य सामाग्री सहयोग गर्दै आएका छन् ।
विश्वव्यापी महामारीको रुपमा फैलिएको कोरोना भाइरसको संक्रमणलाई न्युनिकरण गर्न अभियान संचालन गरेको नेपाल सरकारलाई चिमरीयाले स्वास्थ्य, सुरक्षा र संचारको क्षेत्रमा गरेको सहयोग महत्वपूर्ण भएको वताइएको छ । प्राप्त सामाग्रीका कारण आँफू सुरक्षित भएर जनताको सुरक्षा व्यवस्थामा लाग्न थप हौसला मिलेको इलाका प्रहरी कार्यालय सुरुङ्गाका प्रमुख पदमसुन्दर लिम्बूले वताएका छन् ।
