राम निरौला,
कनकाई खबर \ विश्वव्यापी महामारीका रुपमा रहेको कोरोना भाइरसको संक्रमण हुन नदिन सरकारले गरेको लकडाउनका समयमा अतिआवश्यकीय सामाग्री जुटाउँन नसक्ने स्थानीयबासीकालागि झापा गाउँपालिकाले २५ लाख रुपैंया विनियोजन गरेको छ ।
गाउँपालिकाको विपद व्यवस्थापन समितिको आइतवार बसेको विशेष वैठकको निर्णयले विपन्न परिवारको पहिचान गरी अतिआवश्यकीय खाद्य सामाग्री वितरण गर्न बजेट विनियोजन गरेको गाउँपालिकाका अध्यक्ष जयनारायण शाहले बताएका छन् । गाउँपालिकाको तर्फवाट कोरोना भाइरसको संक्रमणलाई न्युनिकरण गर्न विभिन्न सचेतनामूलक अभियान संचालन गर्दै आएको जानकारी गराउँदै पालिका अध्यक्ष शाहले बिपतको यो समयमा संयमता अपनाउँदै घरभित्रै बस्न गाउँबासीलाई अनुरोध गरेका छन् ।
विपद व्यवस्थापन समितिको बैठकले त्यस्ता विपन्न व्यक्तिको पहिचान गरेर तथ्याङ्क संकलन गर्न सवै वडामा रहेको कोरोना व्यवस्थापन सहजीकरण वडासमितीलाई निर्देशन दिएको गाउँपालिकाका प्रमुख प्रशासकीय अधिकृत जीवन निरौलाले बताएका छन् ।
गाउँपालिकाको विपद व्यवस्थापन कोषबाट कोरोना ब्यस्थापनकालागि पच्चिस लाख विनियोजन गर्ने निर्णय गर्दै विभिन्न संघ,संस्थाहरुलाई समेत विपद कोषमा रकम सहयोग गर्न अनुरोध गरिएको गाउँपालिकाका प्रमुख प्रशासकीय अधिकृत निरौलाले जानकारी दिएका छन् । रकम सहयोग गर्न आवश्यक पर्ने खाता एनआईसी एशियाको झापा बजारमा रहेको शाखाबाट खोलीएको k2CA05125145240 नम्बरको खाता रहेको जानकारी गराइएको छ । विपदको यो घडीमा सहयोग गर्न सवै क्रियाशिल संघसंस्था, उद्योगी, व्यापारी एवम् सरोकारवाला सवैलाई गाउँपालीकाले हार्दिकताका साथ अपिल गरेको छ ।
