कनकाई \ प्रजापति सामुदायिक वन उपभोक्ता समूहको आयोजनामा शनिवारदेखी झापा जिल्ला सामुदायिक वन स्तरीय नकआउट फुटवल प्रतियोगिता हुँदैछ ।कनकाई नगरपालिकाको वडा नं. १ स्थित यस वन क्षेत्रको आफ्नै खेल मैदानमा असोज १३ गतेदेखी ३० गते सम्म संचालन हुने प्रतियोगिताका लागि यतिवेला खेलमैदान सम्याएर कार्यक्रम स्थललाई बेहुली झैं सिंगारीएको छ ।
दुर्गापुर जामुनवारी सडक खण्डमा स्वागत द्वारहरु निर्माण गरी अतिथिहरुका लागि स्वागत सम्मान गर्न आयोजकले विशेष तयारी गरेको छ । प्रतियोगितामा झापा जिल्लामा रहेका ५९ वटा सामुदायिक वन मध्ये २६ वटा वन समूहको सहभागिता रहने आयोजक प्रजापति सामुदायिक वन समूहका अध्यक्ष सूर्यकुमार थापाले वताएका छन् ।
फुटवलसँगै पर्यापर्यटन संचालन गर्दै दिगो आम्दानीको स्रोत निर्माण गरी युवा शक्तिलाई दुव्र्यसनवाट टाढा राख्ने दिर्घकालिन योजनाका साथ प्रतियोगिता संचालन गरीएको अध्यक्ष थापाले जानकारी दिएका छन् ।
शनिवार एक विशेष समारोहका विच आन्तरिक मामिला तथा कानुन मन्त्री हिक्मत कार्कीले उद्घाटन गर्ने प्रतियोगितामा एन्फाका मान्यता प्राप्त रेफ्रीहरुले खेल खेलाउँने वताइएको छ ।
असोज १४ गतेदेखी २२ गते सम्म हरेक दिन २\२ वटा खेल हुनेछन् भने २३ गतेदेखी २८ गते सम्म हरेक दिन १\१ वटा मात्र खेल हुनेछन् । त्यस्तै ३० गते अन्तिम फाइनल खेल हुने आयोजक समितिले जानकारी दिएको छ । प्रतियोगिताको पहिलो दिन जामुनवारी सामुदायिक वन कनकाई १\२ र प्रगति सामुदायिक वन मेचीनगर विच एउटै मात्र खेल हुने वताइएको छ ।
मूल आयोजक समितिका संयोजक समेत रहेका थापाले खेल सम्पन्न गर्न १५ लाख सम्मको खर्चको स्टमेट गरेको वताएका छन् । “सामुदायिक वन युवा र प्रतिभा हाम्रो गहना, पर्यापर्यटनमा गैंडे आहाल प्रवद्र्धन हाम्रो चाहाना” भन्ने मूल नाराका साथ आयोजना गरीएको सामुदायिक वन स्तरीय फुटवल नेपालकै पहिलो प्रतियोगिता रहेको वताइएको छ ।
प्रतियोगितामा प्रथम हुने टिमलाई १ लाख ११ हजार १ सय ११, दोस्रो हुनेलाई ७५ हजार ५ सय ५५ र तेस्रो हुने टिमलाई ४१ हजार १ सय ११ नगद, प्रमाण पत्र र ट्रफी प्रदान गरीने वताइएको छ । प्रतियोगिताका लागि पहिलो र दोस्रो पुरस्कारको प्रायोजन क्रमशः कनकाई नगरपालिका र सहारा नेपालले गर्ने भएको छ । प्रतियोगिताको हरेक दिनको म्यान अफ दी म्याचलाई १ हजार नगद र अन्तिम दिन म्यान अफ दी सिरिजलाई १० हजार नगद प्रदान गरिने आयोजक वन समूहकी सचिव मेनुका श्रेष्ठले वताएकी छन् ।
प्रतियोगिता सम्पन्न गर्नका लागि आवश्यक रकम सहभागी प्रति टिमको प्रवेश शुल्क रु.१० हजार साथै अन्य रकम विभिन्न खेल प्रेमी व्यक्तित्वहरु, उद्योगी व्यवसायी, विभिन्न संघ संस्थाहरुवाट प्राप्त हुने सहयोगवाट संकलन हुने खेलका मुख्य सहयोगी संस्था प्रजापति सामाजिक क्लवका अध्यक्ष दिपेश रिमालले वताएका छन् । “हरियो वन नेपालको धन” भने जस्तै “सामुदायिक वन युवाको मन” लाई सार्थक वनाउँनुका साथै युवालाई गोलबद्ध गरी स्थानीय स्तरको पर्यटन प्रवद्र्धनमा युवालाई खेलसँग जोड्ने मुख्य लक्ष्य रहेको खेल आयोजक समितिका सचिव ईश्वर सुवेदीले वताएका छन् ।
प्रतियोगिता सम्पन्न गर्नका लागि वन समूहका अध्यक्ष थापाको संयोजकत्वमा समूहका सम्पूर्ण पदाधिकारी तथा सदस्यहरु, प्रजापति सामाजिक क्लव, साविक सुरुङ्गा १ मा क्रियाशिल रहेका सम्पूर्ण संघसंस्थाका प्रमुख तथा प्रतिनिधीहरु सहितको १५१ सदस्यीय मूल समारोह समिति निर्माण गरीएको आयोजक समितिका सदस्य डम्वर घिमिरेले वताएका छन् । प्रतियोगितालाई चुस्त दुरुस्त, मर्यादित, अनुशासित र पारदर्शी रुपमा सम्पन्न गर्नका लागि विभिन्न उपसमिति समेत निर्माण गरेर तिव्र गतिमा तयारी पूरा गरेको सदस्य घिमिरेले जानकारी दिएका छन् ।
