कनकाई खबर / झापाको कनकाईमा पहिलो चरणमा ११ बेडको क्वारेन्टाइन स्थापना गरिएको छ ।
विश्वव्यापी महामारीको रुपमा फैलिरहेको कोरोना भाइरस (कोभिड–१९)को संक्रमणबाट हुनसक्ने जोखिम न्यूनीकरण गर्न कनकाई नगरपालिकाले दुर्गापुरस्थित दलित सामुदायिक भवनमा क्वारेन्टटाइन को व्यवस्था गरेको हो । मेची अञ्चल अस्पतालको क्वारेन्टाइनमा राखिएका कनकाई नगर क्षेत्रका १४जनालाई आफ्नै नगरमा क्वारेन्टटाइन स्थापना गरी व्यवस्थापन गरिएको कनकाई नगरका प्रमुख राजेन्द्रकुमार पोखरेलले जनाएका छन् । दुर्गापुरस्थित क्वारेन्टाइनमा स्वास्थ्यकर्मीहरुवाट भएको स्वास्थ्य परिक्षणपछि ८ जना होम क्वारेन्टाइनमा पठाइएको छ भने यो समाचार तयार पार्दासम्म अन्य ६ जना सोही ठाउँमा रहेको वताइएको छ । क्वारेन्टाइनमा खानपान, नियमित स्वास्थ्य परिक्षणको राम्रो व्यवस्था भएको जनाइएको छ ।
कोरोना भाइरसको संक्रमणवाट बच्नकालागि सरकारका तर्फवाट जारी भएको सर्कुलर बिनासर्त पालना गर्नकालागि नगरवासीलाई अनुरोध गर्दै कनकाई नगर प्रमुख पोखरेलले सतर्क हुँदाहुँदै पनि थप कोरेन्टाइन साथै स्वास्थ्य सम्वन्धि अन्य सेवाको आवश्यक्ता परेमा स्थानीय सरकार जुनसुकै बेला पनि तत्पर रहेको वताएका छन् ।
कनकाई नगरकै लक्ष्मीपुरमा समेत थप क्वारेन्टाइनको व्यवस्थापन गर्ने तयारी भइरहेको नगर जनस्वास्थ्य प्रमुख ब्रजेशकुमार मेहताले जानकारी दिएका छन् । कनकाई नगरको सुरुङ्गास्थित प्राथमिक स्वास्थ्य केन्द्रमा ११ जना र घैलाडुवास्थित स्वास्थ्य केन्द्रमा ६ जना स्वास्थ्यकर्मीहरुले नगरका हरेक वडामा रहेका शहरी स्वास्थ्य केन्द्रवाट स्वास्थ्य सेवा दिइरहेको वताइएको छ ।
कोरोना भाइरसवाट नेपालीहरुले ज्यान गुमाउनु नपरोस् भन्ने उद्येश्यका साथ पूर्व तयारीसँगै नेपाल सरकारले देशव्यापी रुपमा लक डाउन गरेपछि पनि हाल क्रमिक रुपले भाइरस संक्रमितको संख्या बढ्दो क्रममा भएसँगै हरेक स्थानीय तहमा क्वारेन्टटाइन, आइसोलेशनको व्यवस्थापन तिव्र गतिमा भइरहेको छ । भर्खरै प्राप्त जानकारी अनुसार प्रदेश नं. १ का लागि धरानस्थित विपी कोइराला स्वास्थ्य विज्ञान प्रतिष्ठानमा समेत कोरोना परिक्षण प्रयोगशाला स्थापना हुने भएको छ । जसका कारण काठमाण्डौको टेकुस्थित शुक्रराज ट्रपिकल तथा सरुवा रोग अस्पताल सम्म जानु नपर्ने भएको छ । धरानवाट दिइने सेवा जतिसक्दो चाँडो संचालनमा आउने बुझिएको छ ।
धरानस्थित विपी कोइराला स्वास्थ्य विज्ञान प्रतिष्ठान
