दुर्गापुर \ ग्रामिण क्षेत्रमा रहेका वेरोजगार महिलाहरुलाई स्वरोजगार बनाउँने उद्येश्यका साथ कनकाई ७ स्थित दुर्गापुरमा सिपमुलक सिलाई कटाई तालिम केन्द्रको उद्घाटन गरिएको छ । 
सामाजिक क्षेत्रमा काम गर्दै आएको नारी संरक्षण नेपाल नामक संस्थाको आर्थिक सहयोगमा दुर्गापुर बजारमा संचालनमा ल्याइएको तालिम केन्द्रको एक कार्यक्रमका विच स्थानीय वडाका वडाअध्यक्ष लिलावहादुर कन्दङ्वाले उद्घाटन गरेका हुन् । तालिम केन्द्रमा तीन वटा सिलाई मेसिन, एक इन्टर लक मेसिन साथै तीन महिनाको कोठा भाडासहित एउटा टेलर्सकालागि आवश्यक पर्ने फर्निचर लगायत सम्पूर्ण सामाग्रीको संस्थाले नै व्यवस्थापन गरेको नारी संरक्षण नेपाल झापा सम्पर्क मञ्चका संयोजक सविर कन्दङ्वाले बताएक छन् । तालिम केन्द्र संचालनकालागि ८ महिना अघिदेखि नै संस्थाले स्थानीय मेनुका बयलकोटी, सीता मग्रान्ती र सुकमाया लिम्वूलाई विशेष किसिमको सिपमूलक तालिम निशुल्क रुपमा उपलव्ध गराएको थियो । तालिम प्राप्त गरेका किशोरीहरुले आगामी दिनमा सिलाई कटाई सम्वन्धीको तालिम लिन चाहने जोकोहीलाई पनि आँफूले सिकेको सिप सिकाउँन पछि नहट्ने बताएका छन् ।
नारी संरक्षण नेपाल संस्थाले सिपमूलक तालिम दिएर रोजगारीको सिर्जना गरी जिविकोपार्जनको माध्यम बनाएको भन्दै स्थानीयवासीले सामाजिक क्षेत्रमा संस्थाले खेलेको भूमिकाको प्रशंसा गरेका छन् । मुलुकको समृद्धिकालागि नेपालका विभिन्न क्षेत्रमा यस किसिमको सामाजिक गतिविधी गर्दै आएको संस्थाको प्रधान कार्यालय नारायणघाट चितवनमा रहेको छ भने यसको निर्देशकका रुपमा सामाजिक अभियन्ताद्वय रञ्जीत गहतराज र लोकेन्द्र विक रहेको वताइएको छ । झापाको कनकाई ६ स्थित चम्पापुर माविमा विद्यालयस्तरको अध्ययन गरेका रञ्जीतले कनकाई नगर क्षेत्रको समृद्धिकालागि अझै नयाँ कार्यक्रम लिएर अघि बढ्ने बताएका छन् । 
यस अघिदेखि नै संस्थाले कनकाई नगर क्षेत्रका २६ जना गरिव, असहाय तथा विपन्न वर्गका वालवालिकाहरुकालागि खाद्य सामाग्री, विद्यालय पोशाक, कापी किताव, औषधी उपचार लगायत विद्यालयमा आवश्यक पर्ने सम्पूर्ण आर्थिक सहयोग गर्दै विपन्न वर्गकालागि अभिभावकत्व ग्रहण गरिरहेको झापा संयोजक कन्दङ्वाले बताए । कनकाई ७ की महिला वडा सदस्य गीता चौहानको अध्यक्षता साथै वडा सदस्य प्रकाश शिवाकोटीले संचालन गरेको तालिम केन्द्र उद्घाटन कार्यक्रममा दुर्गापुर बजार व्यवस्थापन समितिका अध्यक्ष देवीप्रसाद भट्टराई, स्थानीय समाजसेवीहरु प्रल्हाद घिमिरे, चन्द्रमान कन्दङ्वा, अमृत योङ्हाङ् लगायतले मन्तव्य राखेका थिए ।
