सुरुङ्गा \ सनराईज बैंक सुरुङ्गा शाखाले वैंँकको ११ औं वार्षिक उत्सवको अवसरमा कनकाई नगरपालिका वडा नम्बर ६ स्थित गायत्री मन्दिर परिसरमा सोमवार बृक्षरोपण गरेको छ । नेपाल सरकारको “एक कर्मचारी एक फलफुल बृक्षरोपण” कार्यक्रम तथा बैंकको सामाजिक उत्तरदायित्व वहन गर्ने उद्धेश्य अनुरुप कार्यक्रममा फलफुलका विरुवा रोपिएँको वताइएको छ ।
कार्यक्रममा सनराईज बैंक सुरुङ्गा शाखाका सम्पुर्ण कर्मचारीहरुले एक एक वटा भिन्ना भिन्नै फलफुलका विरुवाहरु रोपण गरेका थिए । कार्यक्रममा कनकाई नगरपालिका वडा नम्बर ६ का वडा अध्यक्ष लक्ष्मी प्रसाद ओली लगायत, वडा सदस्यहरु तथा गायत्री मन्दिर ब्यवस्थापन समितीका पदाधीकारीहरुको बाक्लो उपस्थिती रहेको थियो ।
सोही अवसरमा भद्रपुर नगरपालिका वडा नम्वर ५ मा अवस्थित सनराईज बैंक लि. , भद्रपुर शाखाले एक समारोहका बीच भद्रपुर नगरपालिका वडा नम्बर ५ का वडा अध्यक्ष श्री वन्धु कार्कीलाई डस्टवीन हस्तान्तरण गरेको छ । सनराईज बैंकको शाखा कार्यालय रहेकै स्थानमा आयोजित डस्टवीन हस्तान्तरणको संक्षीप्त कार्यक्रममा वडा नं. ५ का वडा अध्यक्ष श्री वन्धु कार्की, भद्रपुर बजार व्यवस्थापन समितीका अध्यक्ष हसरत अलि तथा सनराईज बैंक भद्रपुर शाखाका शाखा प्रवन्धक भिषण निरौला लगायतले मन्तव्य राखेका थिए ।
सनराईज बैंकले सामाजिक उत्तरदायित्व वहन गर्ने शिलशिलामा बर्षेनी यस्ता कार्यक्रमहरु गर्दै आएको र आगामी बर्षहरुमा पनि गर्दै जाने शाखा प्रवन्धक निरौलाले प्रतिबद्धता व्यक्त गरेका थिए । प्रवन्धक निरौलाले आफु रहेको समाजमा यस्ता खाले सहकार्य गर्न बैंक सँधै तत्पर रहने र यसपालिको यो कार्य गर्ने अवसर प्रदान गरिदिएकोमा भद्रपुर नगरपालिका तथा ५ नम्बर वडा कार्यालयलाई धन्यवाद समेत ब्यक्त गरेका थिए ।
उक्त कार्यक्रममा भद्रपुर वडा नम्बर ५ का वडा सदस्यहरु, ब्यवसायीहरु तथा सनराईज बैंकका कर्मचारीहरुको उपस्थिति रहेको थियो । बैंकले हस्तान्तरण गरेका डस्टवीनहरु बैंक तथा वडा कार्यालयको सहकार्यमा आवश्यकता अनुसार बजारका विभिन्न भागमा राखिने र डस्टवीनमा संकलित फोहोरलाई वडा कार्यालयले व्यवस्थापन गर्ने कुरा कार्यक्रममा जानकारी गराइएको थियो ।
