सुरुङ्गा \ कनकाई नगरपालिका ३, सुरुङ्गा स्थित भगवती बचत तथा ऋण सहकारी संस्था लि.को अठारौं वार्षिक साधारण सभा सम्पन्न भएको छ ।
कनकाई उद्योग वाणिज्य संघको सभा हलमा शुक्रवार सम्पन्न साधारण सभाको उद्घाटन समारोहलाई सम्वोधन गर्दै कार्यक्रमका प्रमुख अतिथी कनकाई नगरका प्रमुख राजेन्द्र पोखरेलले सामाजिक क्षेत्रमा सहकारी संस्थाहरुले पुर्याएको योगदानको प्रशंसा गरेका छन् ।
गाउँघरको थोरै रकम संकलन गरी आर्थिक अवस्था कमजोर भएका मानिसलाई सस्तो व्याजमा लगानी गरेर सर्वसाधारणलाई समेत उद्योगी, व्यवसायी साथै स्वरोजगार वनाउँने काममा सहकारीहरु अग्र स्थानमा रहेको भन्दै नगर प्रमुख पोखरेलले सहकारी संस्थाहरुसँग स्थानीय तहले सहकार्य गरेर अघि बढ्न चाहेको वताएका छन् ।
संस्थाका अध्यक्ष तिलचन्द्र उप्रेतीको सभापतित्वमा सम्पन्न साधारण सभामा वार्षिक प्रतिवेदन प्रस्तुत गर्दै अध्यक्ष उप्रेतीले सिमित शेयर सदस्यहरुको सहभागितामा २०५७ सालमा स्थापना भएको संस्था अहिले आएर १ हजार १ सय २५ जना शेयर सदस्यका साथमा सुरुङ्गा स्थित आफ्नै भवनवाट कारोवार संचालन भइरहेको सभामा जानकारी गराएका छन् ।
प्रतिवेदन प्रस्तुत गर्दै अध्यक्ष उप्रेतीले गत असार मसान्त सम्मको कुल चुक्ता शेयर पुँजी ३ करोड ९४ लाख ७४ हजार ५ सय भएको जानकारी दिएका छन् । त्यस्तै असार मसान्त सम्मको मौज्दात रकम ११ करोड १९ लाख ७ हजार १ सय तीन रहेको साधारण सभामा जानकारी गराइएको छ ।
यस आर्थिक वर्षमा २१ करोड ९२ लाख ३५ हजार ६ सय ५३ आर्थिक संकलन भएको वार्षिक प्रतिवेदन मार्फत सार्वजनिक गरीएको छ । संस्थाको वन्द सत्रमा अध्यक्षको प्रतिवेदन , आन्तरिक लेखा समितिको प्रतिवेदन साथै विभिन्न नीति तथा कार्यविधिमाथि व्यापक छलफल गरेर सर्वसम्मत रुपमा पारित गरीएको छ ।
संस्थाका संचालक सदस्य प्रभाखर कडरीयाले स्वागत तथा सदस्य लिलाप्रसाद भेट्वालले संचालन गरेको कार्यक्रममा जिल्ला वचत तथा ऋण सहकारी संस्थाका रेवती खनाल, जिल्ला सहकारी संघ झापाका प्रतिनिधी सन्तोष मैनाली, दुर्गापुर सहकारी संस्थाका अध्यक्ष गोपाल उप्रेती, कनकाई मावि सुरुङ्गाका प्रधानाध्यापक निर्मल खतिवडा लगायतले मन्तव्य राखेका थिए ।
