कनकाई \ आदिवासी लिम्बू जातिहरुको प्रतिनिधि मूलक संस्था किराँत याक्थुङ चुम्लुङको ३० औं स्थापना दिवस विभिन्न कार्यक्रमका साथ आइतवार मनाइएको छ ।
विर्तामोड नगरपालिका–१ स्थित किराँत याक्थुङ चुम्लुङ जिल्ला शाखा झापाको आयोजनामा सम्पन्न गरिएको सो स्थापना दिवस कार्यक्रममा झापा जिल्लाबाट केन्द्रीय तहमा निर्वाचित हुने पदाधिकारीहरुलाई सम्मान गरिएको थियो । सम्मानित हुनेहरुमा केन्द्रीय सल्लाहकार सदस्य जीतबहादुर लावती, केन्द्रीय सदस्यद्वय पूर्णमान हाङसरुम्वा र विष्णुमाया चेम्जोङ, केन्द्रीय पार्षद सदस्यहरु अमृत योङहाङ, सेसेहाङ फियाक र कृष्ण कुमार थेवे रहेका छन ।
संस्थाका अध्यक्ष भक्त खेवाङको सभापतित्व रहेको कार्यक्रममा किराँत याक्थुङ चुम्लुङका केन्द्रीय सल्लाहकार सदस्य जीतबहादुर लावतीको प्रमुख आतिथ्यता तथा पूर्व राज्य मन्त्री श्रीप्रसाद जवेगुको विशेष आतिथ्यता रहेको थियो ।
लिम्बुजातिको साँस्कृतिक भेषभुषामा सजिएका कलाकारहरुद्वारा माङलाङ, केलाङ, धाननाच नृत्यहरु प्रस्तुत गरिएको सो कार्यक्रममा पूर्व मन्त्री श्रीप्रसाद जवेगु, आदिवासी महासंघ झापाका अध्यक्ष पारसमणी राई, केन्द्रीय सदस्य पूर्णमान हाङसरुम्वा, विष्णुमाया चेम्जोङ, केन्द्रीय परिषद सदस्य अमृत योङहाङ, निर्मला तावा लगायतले शुभकामना मन्तव्य राखेका थिए । संस्थाका उपाध्यक्ष जन बहादुर जवेगुले स्वागत गरेको कार्यक्रमको संचालन जिल्ला सचिव जीवन कुमार सिंगकले गरेका थिए ।
