सुरुङ्गा \ आर्थिक अभावका कारण अकालमै आफ्नो जीवन व्यतित गर्नु पर्ने अवस्थाका ग्रामिण क्षेत्रका विरामीहरुलाई लक्षित गरी झापाको कनकाई नगरपालिका ३ स्थित मेरीगोल्ड हस्पिटल सुरुङ्गाले एक दिने निशुल्क स्वास्थ्य शिविर संचालन गरेको छ ।
हस्पिटलको बार्षिकउत्सवको अवसरमा आयोजित एकदिने निशुल्क स्वास्थ्य शिविरमा विभिन्न रोगका ८ सय ९३ जनाले निशुल्क स्वास्थ्य लाभ लिएका छन ।शनिवार हस्पिटलले आफुले सेवा प्रारम्भ गरेको नौ बर्ष पुरा गरेको अवसरमा एक दिन निशुल्क स्वास्थ्य शिविरको आयोजना गरेको अस्पतालका प्रमुख डाक्टर आरएन संग्रौलाले बताए ।
सर्वसाधारण समेतलाई जानकारी होस् भन्ने उद्येश्यले प्रचारप्रसारका साथ गरिएको शिविरमा भारतबाट समेत ठुलो सङ्ख्यामा विरामीहरु स्वास्थ्य शिविरमा सहभागि भएको वताइएको छ । विराट टिचिङ् हस्पिटलको समेत प्राविधिक सहयोगमा गरिएको स्वास्थ्य शिविरमा धेरै विरामीहरु हार्डजोर्नी सम्वन्धि रहेका थिए ।
हार्डजोर्नी तथा नशा रोग सम्वन्धि १४४ जना विरामीले स्वास्थ्य जाँच गराएका थिए ।
यसैगरी प्रेसर , सुगर तथा थाइराइडका १३६ जना , नाक , कान , घाँटीका ८० जना , छालाका ७० जना , वालवालिका ३५ जना , स्त्री रोग सम्वन्धि ११४ जना, ८८ जनाले भिडियो एक्सरे सेवा र १९० जनाले ५० प्रतिशत छुटमा ल्याव परिक्षण गराएका थिए । शिविरमा १८० जना महिलाको पाठेघरको मुखको क्यान्सर परिक्षण गराएकोमा १० जनामा समस्या देखिएकोले अन्यत्र रेफर गरिएको डाक्टर संग्रौलाले बताए ।
शिविरमा मेरिगोल्ड हस्पिटल तथा विराट टिचिङ नर्सिङ्ग हस्पिटलका डाक्टरहरु अरविन्द देव , सगुन खत्री , राजीव शाह , दिलिप चौधरी , सिवि झा , अब्दुल कलाम , सोना पोखरेल , अख्तर अली र डाक्टर आरएन संग्रौलाले स्वास्थ्य जाँच गराएका थिए । स्वास्थ्य परिक्षणका लागि झापाको कनकाई नगरपालिका , अर्जुनधारा नगरपालिका , शिवसताक्षी , झापा गाउँपालिका , इलामको माइ नगरपालिका तथा छिमेकी भारतको विहार राज्यबाट समेत गरी ५६ जना विरामी स्वास्थ्य परिक्षणका लागि आएका थिए ।
भारतको विहार राज्यमा भरपर्दो स्वास्थ्य संस्था नहुदा नेपालमा उपचारका लागि आउने गरेको उपचारमा आएका विरामी अर्जुन औधरीले वताएका छन् । स्वास्थ्य जाँच गराउँन आँउने विरामीबाट डाक्टरले स्वास्थ्य परिक्षण गरे वापत केहि शुल्क लिने गरेको साथै स्वास्थ्य परिक्षणका लागि सम्बन्धित रोगका डाक्टरहरु एकै ठाउँमा उपलब्ध नहुदा दुरदराजका विरामीहरु लामो समयदेखि रोग पालेर बस्न बाध्य रहेकाले सवै किसिमका विरामीहरुलाई लक्षित गरेर शिविर संचालन गरिएको हस्पिटलका अध्यक्ष टेकनारायण संग्रौलाले वताएका छन् । आर्थिक अभावका कारण रोग पाल्न बाध्य गरिब जनताका लागि स्थापनाकालदेखी नै हरेक वर्ष वार्षिक उत्सवको अवसर पारेर हस्पिटलले निशुल्क स्वास्थ्य शिविर गर्दै आएको अध्यक्ष संग्रौला बताउँछन् ।
