कनकाई खबर/ झापाको कनकाई नगरपालिकाको १३औं प्रमुख प्रशासकीय अधिकृतका रूपमा उपसचिव पंकज भुर्तेलले आफ्नो कार्यभार सम्हालेका छन्।
सोमबारदेखि औपचारिक रूपमा पालिकाको प्रशासनिक नेतृत्व आफ्नो हातमा लिएका भुर्तेलले स्थानीय प्रशासनमा सुशासन, पारदर्शिता र जवाफदेहिताको सवालमा कुनै पनि प्रकारको सम्झौता नगर्ने दृढता व्यक्त गरेका छन्।
देशव्यापी रूपमा नागरिक स्तरबाट सुशासनको माग तीव्र भइरहेका बेला आम नगरबासीको चाहनालाई उच्च कदर गर्दै पालिकाले अंगीकार गरेका सुशासनका नीतिहरूलाई अक्षरसः र कडाइका साथ लागू गर्ने उनले प्रतिबद्धता जनाए। अनुभवी प्रशासक भुर्तेलको आगमनसँगै कनकाईमा थप सुशासन र समृद्धिको नयाँ आशा पलाएको छ।
कनकाई खबरसँगको विशेष संवादमा प्रमुख प्रशासकीय अधिकृत भुर्तेलले आफ्नो कार्यदिशा र प्रशासनिक दृष्टिकोण स्पष्ट पारेका छन्। उनले कुनै पनि बाह्य वा राजनीतिक दबाबभन्दा माथि उठेर विशुद्ध रूपमा स्थानीय सरकार सञ्चालन ऐन, २०७४-ले निर्देश गरेका काम, कर्तव्य र अधिकार क्षेत्रभित्रै रहेर सम्पूर्ण कार्य सम्पादन गर्ने बताए।
कानुनको परिधिभित्र रहेर आम नागरिकलाई छिटो–छरितो, झन्झटमुक्त र प्रविधिमैत्री सेवा प्रवाह गर्नु नै आफ्नो पहिलो र मुख्य जिम्मेवारी हुने उनको भनाइ थियो। संघीय सरकारको विभिन्न जिम्मेवार निकायहरूमा रहेर लामो समय काम गरेका भुर्तेल यसअघि झापाकै शिवसताक्षी र अर्जुनधारा नगरपालिका साथै साविक जिल्ला विकास समितिको कार्यालय झापा र कोशी प्रदेश कार्यालयमा समेत एक सफल, निष्पक्ष र कुशल प्रशासकका रूपमा आफ्नो कार्यकाल पूरा गरिसकेका परिपक्व कर्मचारी हुन्।
पर्यटन मन्त्रालयबाट नेपाल सरकारको निजामती सेवामा प्रवेश गरेका भुर्तेलले लामो समय स्थानीय विकास मन्त्रालयअन्तर्गत रहेर स्थानीय तहको विकास र सेवा प्रवाहमा आफ्नो जीवनको महत्वपूर्ण समय खर्चिएका छन्। स्थानीय तहको भूगोल, ऐन–नियम र जनअपेक्षालाई नजिकबाट बुझेकाले पनि कनकाईमा उनीबाट ठूलो सुधारको अपेक्षा गरिएको छ।
यसअघि २० महिनासम्म कनकाई नगरपालिकामा इमानदारिताका साथ प्रशासनिक नेतृत्व सम्हालेर चर्चा कमाएका नारायण न्यौपानेको अन्यत्र सरुवा भएपछि रिक्त रहेको स्थानमा भुर्तेलको आगमन भएको हो। निवर्तमान अधिकृत न्यौपानेको कार्यकालमा पालिकाको प्रशासनिक कामलाई थप व्यवस्थित, मर्यादित र चुस्त बनाउन महत्वपूर्ण योगदान पुगेको स्मरण गर्दै नवनियुक्त हाकिम भुर्तेलले सोही बलियो जगमा उभिएर कनकाईलाई अझ समृद्ध र अनुशासित पालिका बनाउने अठोट व्यक्त गरे।
विगतका प्रशासनिक उतारचढाव र चुनौतीहरूलाई चिर्दै, स्थानीय जनप्रतिनिधिहरू, कर्मचारी संयन्त्र र आम नगरबासीसँग मजबुत सहकार्य गरी कनकाईमा सुशासनको नयाँ अध्याय सुरु गर्ने र विकासको गतिलाई तीव्रता दिने ठूलो जिम्मेवारी अब नयाँ प्रमुख प्रशासकीय अधिकृत भुर्तेलको काँधमा आएको बताइएको छ ।