कनकाई खबर / झापाको कनकाई नगरपालिकामा डेंगी रोगको संक्रमण र प्रकोपलाई नियन्त्रण गर्न एक बहु क्षेत्रीय समन्वय बैठक सम्पन्न भएको छ।
कनकाई नगरपालिकाको सभाहलमा नगर प्रमुख राजेन्द्रकुमार पोखरेलको अध्यक्षतामा आयोजित विशेष बैठकले नगरभित्र डेंगीको जोखिम न्यूनीकरणका लागि तत्काल ठोस र व्यावहारिक कदम चाल्ने निर्णय गरेको बताइएको छ ।
बैठकमा नगर उपप्रमुख आशा शिवाकोटी , नगरपालिका क्षेत्रका सबै वडाका स्वास्थ्य कर्मचारीहरू, जनप्रतिनिधिहरू, स्थानीय अगुवा तथा सरोकारवालाहरूको उल्लेख्य सहभागिता रहेको थियो। वर्षातको मौसमसँगै लामखुट्टेको प्रजनन् प्रक्रिया तीव्र हुने र डेंगीको महामारी फैलन सक्ने अवस्थालाई मध्यनजर गर्दै नगरस्तरीय रणनीतिक योजना बनाउन यो बैठकको आयोजना गरिएको कनकाई नगरपालिकाका स्वास्थ्य शाखा प्रमुख नारायण अधिकारीले जानकारी दिए ।
बैठकलाई सम्बोधन गर्दै नगर प्रमुख राजेन्द्र कुमार पोखरेलले डेंगी नियन्त्रण केवल स्वास्थ्य शाखाको मात्र जिम्मेवारी नभई सम्पूर्ण समुदायको साझा दायित्व भएको बताए । नगर प्रमुख पोखरेलले भने, डेंगीको प्रकोप जनस्वास्थ्यका लागि ठूलो चुनौती बनिरहेको छ, यसलाई नियन्त्रण गर्न नगरपालिकाले आफ्नो तर्फबाट बजेट र जनशक्तिको पूर्ण परिचालन गर्नेछ।
तर, जबसम्म प्रत्येक नगरवासीले आफ्नो घर र आँगन सफा राख्नुहुन्न, तबसम्म यो लामखुट्टेलाई नष्ट गर्न सकिँदैन। नगर प्रमुख पोखरेलले सम्पूर्ण जनप्रतिनिधि र स्वास्थ्यकर्मीहरूलाई तुरुन्तै आ–आफ्नो वडा र टोलमा पुगेर जनचेतना जगाउन साथै खोजौँ र नष्ट गरौँ अभियानलाई महाअभियानका रूपमा अघि बढाउन निर्देशन दिए ।
नगरका सबै वडामा खोजौँ र नष्ट गरौँ अभियान चलाउन बैठकले नगरका सबै वडामा तत्काल लामखुट्टेको वासस्थान खोजौँ र नष्ट गरौँ अभियान सञ्चालन गर्ने निर्णय गरेको छ। जनप्रतिनिधि,स्वास्थ्यकर्मीहरू साथै स्थानीय क्रियाशिल संघसंस्थाका प्रमुख तथा प्रतिनिधिहरुको संयुक्त टोलीले प्रत्येक वडाका टोल–टोलमा पुगेर पानी जम्ने ठाउँहरू पहिचान गरी लामखुट्टेको लार्भा नष्ट गर्ने र स्थानीय नागरिकलाई सचेत गराउने निर्णय बैठकले पारित गरेको नगर स्वास्थ्य शाखाका प्रमुख नारायण अधिकारी बताउँछन् ।
कार्यक्रमको प्राविधिक सहजीकरण नगर स्वास्थ्य प्रमुख अधिकारी र जनस्वास्थ्य अधिकृत दीक्षा नेपालले गरेका थिए । डेंगीको वर्तमान अवस्था, लामखुट्टेको जीवनचक्र र नियन्त्रणका उपायहरूबारे विस्तृत जानकारी गराइएको छ । कार्यक्रमको सञ्चालन नगर स्वास्थ्य शाखाकी सिनियर अनमी बिना दबाडीले गरेकी थिइन् ।
कनकाई नगरपालिकाको स्वास्थ्य शाखाले डेंगी संक्रमणबाट बच्न नगरवासीलाई निम्न सावधानीहरू अपनाउन विशेष अनुरोध गरेको छ । जसअनुसार घर र कार्यस्थल वरपर पानी जम्न सक्ने सम्भावित ठाउँहरू -पुराना टायर, खाली बट्टा, गमला, कुलर) सधैं सफा र सुख्खा राख्ने। यो लामखुट्टे दिउँसो र बिहान–बेलुका बढी सक्रिय हुने भएकाले बाहिर निस्कँदा पूरा शरीर ढाक्ने लामो बाहुला भएको कपडा लगाउने र लामखुट्टे भगाउने मलम प्रयोग गर्ने। दिउँसो वा राति जुनसुकै समयमा सुत्दा अनिवार्य रूपमा झुल भित्र मात्र सुत्ने ।
एक्कासी उच्च ज्वरो आउने, आँखाको पछाडि दुख्ने, र जोर्नीहरू दुख्ने जस्ता लक्षण देखिएमा तुरुन्त स्वास्थ्य संस्थामा परीक्षण गराउने। ज्वरो आउँदा चिकित्सकको सल्लाह बिना इबुप्रोफेन वा एस्पिरिन जस्ता पेनकिलर नखाई प्यारासिटामोल मात्र प्रयोग गर्ने।
नगरपालिकाले डेंगी नियन्त्रणको यस अभियानमा सक्रियतापूर्वक सहभागी भई आफ्नो घर र टोल सफा राख्न सम्पूर्ण कनकाई नगरवासीमा हार्दिक अपिल गरेको छ।