कनकाई खबर / झापाको कनकाई नगरपालिकाकी उपप्रमुख आशा शिवाकोटीले कुनै पनि परिवारमा आमा, हरेक हिसावले स्वस्थ छिन् भने एउटा सिङ्गो परिवार, समाज साथै राष्ट्र नै स्वस्थ हुन सक्ने भएकाले आमाहरुलाई लक्षित गरेर संचालन गरिएको महिला प्रजनन स्वास्थ्य सम्बन्धी एकदिवसीय प्रशिक्षण कार्यक्रम अत्यन्तै प्रभावकारी भएको बताएकी छन् ।
कनकाई १ स्थित श्री दुर्गा भगवती मन्दिर धार्मिक विकास संस्थाको आयोजना तथा कारितास नेपालको सहयोग एवं समन्वयमा सुरक्षित वैदेशिक रोजगार तथा महिला प्रजनन स्वास्थ्य सम्बन्धी एकदिवसीय प्रशिक्षण कार्यक्रमलाई प्रमुख अतिथीको आसनबाट सम्बोधन गर्दै उपप्रमुख शिवाकोटीले आफ्नै ठाउँमा सञ्चालन भएको महिला लक्षित स्वास्थ्य सम्बन्धी सचेतनामूलक कार्यक्रमबाट भरपूर लाभान्वीत हुन सहभागी सबैलाई अनुरोध गरेकी छन् । त्यस्तै कारितास नेपालले उठाउँदै आएको सुरक्षित वैदेशिक रोजगारको सुनिश्चिततालाई थप प्रभावकारी बनाउँनु पर्नेमा उपप्रमुख शिवाकोटीले जोड दिएकी छन् ।
संस्थाकी अध्यक्ष सरला दहाल पोखरेलको अध्यक्षता एवं उपप्रमुख शिवाकोटीको प्रमुख आतिथ्य रहेको कार्यक्रममा ८० जना महिलाहरु लाभान्वीत भएका थिए ।
कार्यक्रममा महिला प्रजनन स्वास्थ्य सम्बन्धी प्रशिक्षणको सहजीकरण सोही क्षेत्रमा रहेर लामो समयको अनुभव प्राप्त प्रशिक्षक सुजन काफ्ले निरौलाले र सुरक्षित वैदेशिक रोजगारसँग सम्बन्धित विषयमा कारितास नेपालका प्रतिनिधि सुदिप खरेलले प्रशिक्षण प्रदान गरेका थिए । कार्यक्रममा सहभागी महिलाहरुले सम्बन्धित विषयमा जिज्ञासा राखेका थिए ।
दुर्गा भगवती मन्दिर धार्मिक विकास संस्थाकी सदस्य सरिता अधिकारीले शाब्दीक स्वागत गरेको औपचारिक कार्यक्रममा संस्थाका पुर्व अध्यक्ष शम्भुप्रसाद पोखरेलले शुभकामना मन्तव्य राखेका थिए । प्रशिक्षण समापनका अवसरमा सहभागी महिलाहरुका तर्फबाट अनुभुती मन्तव्य राख्दै कनकाई १ निवासी भीमा पोखरेल र कनकाई ७ निवासी देवका पराजुलीले सुरक्षित वैदेशिक रोजगार तथा महिला प्रजनन स्वास्थ्य सम्बन्धीको एकदिवसीय प्रशिक्षण अत्यन्तै प्रभावकारी भएको बताएका छन्। प्रशिक्षणमा सहभागी महिलाहरुले आँफूभित्र रहेका साना मसिना महिलाको स्वास्थ्यसँग सम्बन्धित विशेष समस्याहरु प्रशिक्षकलाई खुलेर राखेका थिए ।
दुर्गापुरस्थित सगुन पार्टी प्यालेसमा सम्पन्न औपचारिक विशेष कार्यक्रमको सहजीकरण आयोजक संस्थाका सचिव इन्द्रहरी भट्टराई र सहसचिव डिल्ली रिजालले गरेका थिए ।
