कनकाई खबर / झापाको कनकाई नगरपालिकामा अपाङ्गता भएका नागरिकलाई सहायक सामग्री वितरण गरिएको छ ।
कनकाई नगरपालिका, कोशी प्रदेश सामाजिक विकास मन्त्रालय र करुणा फाउण्डेसनको त्रिपक्षिय साझेदारीमा विभिन्न १७ किसिमका सहायक सामाग्री १३ जना अपांगता भएका नागरिकहरुलाई वितरण गरिएको हो ।
कनकाई नगरपालिकाकी उपप्रमुख आशा शिवाकोटीको अध्यक्षता एवं नगर प्रमुख राजेन्द्रकुमार पोखरेलको प्रमुख आतिथ्यमा नगरपालिका परिसरमा एक संक्षिप्त कार्यक्रमका बीच सामाग्री वितरण गरिएको हो । कनकाई नगर क्षेत्रका विभिन्न वडामा रहेका अपाङ्गता भएका व्यक्तिहरुको पहिचान गरि अवस्था र आवश्यक्ताका आधारमा यस अघिदेखी नै विभिन्न किसिमका सहायक सामाग्री वितरण हुँदै आएको कनकाई नगरपालिका महिला तथा बालबालिका शाखाकी प्रमुख तुलसा थापाले जानकारी दिएकी छन् ।
कनकाई नगरमा करिब १ हजार २ सयको संख्यामा अपाङ्गता भएका व्यक्ति भएपपनि आवश्यकता र अवस्थाका आधारमा नगरका सबै वडामा सहायक सामाग्री बितरण हुँदै आएको बताइएको छ । कनकाई नगर क्षेत्रका अपाङ्गता भएका व्यक्तिहरु साथै त्यस्ता परिवारका सदस्यहरुलाई लक्षित गरी आयआर्जनमा टेवा पुर्याउने उद्येश्यले कनकाई नगरपालिकाले यस अघि विभिन्न विधामा ६५ दिने तालिम समेत दिएर आत्मनिर्भर बनाउने प्रयास गरेको बताइएको छ ।
अपाङ्गता भएका नागरिकहरूलाई एक ठाउँबाट अर्को ठाउँ आवतजावत गर्न असहज भइरहेको अवस्थामा सहायक सामग्रीले सहज बनाउने विश्वास व्यक्त गर्दै नगर प्रमुख पोखरेलले यस किसिमको सहयोगले लक्षित वर्ग प्रत्यक्ष रुपमा लाभान्वित भएको बताएका छन् । यस पवित्र कार्यमा सहकार्य गर्ने कोशी प्रदेश सामाजिक विकास मन्त्रालय र करुणा फाउण्डेसनप्रति नगर प्रमुख पोखरेलले धन्यवाद सहित आभार प्रकट गरे ।
त्रिपक्षिय साझेदारीमा भएको सहायक सामाग्री वितरण कार्यक्रमले सम्बन्धित व्यक्ति र परिवारलाई ठूलो राहत मिलेको भन्दै कनकाई नगरपालिकाकी उपप्रमुख आशा शिवाकोटीले आगामी दिनमा समेत यस किसिमको सहकार्यलाई निरन्तरता दिँदै अघि बढ्नुपर्नेमा जोड दिएकी छन् । अपाङ्गताका क्षेत्रमा विभिन्न कार्यक्रम सहित सहकार्य गर्दै आएको प्रदेश सरकार सामाजिक विकास मन्त्रालय र करुणा फाउण्डेसनका प्रतिनिधिहरुलाई समय समयमा आवश्यक सामाग्री सहित लक्षित वर्गसँगको भेटघाटमा आउनुपर्ने तर्फ जोड दिँदै उपप्रमुख शिवाकोटीले सम्बन्धित परिवारबाट समेत अपाङ्गता भएका व्यक्तिहरुको विशेष ख्याल गर्न अनुरोध गरेकी छन् ।
सहायक सामाग्री वितरण कार्यक्रममा सिबिआर बिराटनगरका प्रबन्धक नबिन दहाल सहितको प्राविधिक टोलीले आवश्यक सहजीकरण गरेको जनाइएको छ । प्रवन्धक दहालले यो सहयोग एवं सहकार्यलाई आगामी दिनमा समेत निरन्तरता दिने प्रतिवद्वता व्यक्त गरेका छन् ।
सहायक सामाग्री वितरण कार्यक्रमको सहजीकरण कनकाई नगरपालिकाकी महिला तथा बालबालिका शाखाकी प्रमुख तुलसा थापाले गरेकी थिइन् ।
