कनकाई खबर / कनकाई–३, सुरुङ्गास्थित कनकाई बहुमुखी क्याम्पमा सञ्चालन भइरहेको वि.वि.एस. प्रथम वर्षको परीक्षालाई लिएर सामाजिक सञ्जालमा फैलिएका विभिन्न नकारात्मक तथा भ्रामक सामग्रीप्रति क्याम्पस प्रशासनले गम्भीर ध्यानाकर्षण भएको जनाएको छ। क्याम्पसले परीक्षाको वास्तविकता नबुझी सामाजिक सञ्जालमा आएका सामग्रीका आधारमा धारणा नबनाउन सरोकारवाला सबैलाई आग्रह गरेको छ।
त्रिभुवन विश्वविद्यालय, परीक्षा नियन्त्रण कार्यालय, बल्खु, काठमाडौंअन्तर्गत मिति २०८३ साउन २५ गते क्याम्पसमा दिवा सत्रमा सञ्चालित वि.वि.एस. प्रथम वर्षको परीक्षालाई लिएर सामाजिक सञ्जालमा भिडियो, पोस्ट लगायतका सामग्री सार्वजनिक भएपछि क्याम्पसले आधिकारिक धारणा सार्वजनिक गरेको हो।
क्याम्पसका परीक्षा केन्द्राध्यक्ष एवं क्याम्पस प्रमुख विकासप्रसाद उप्रेतीद्वारा हस्ताक्षरित ध्यानाकर्षण पत्रमा उक्त दिनको परीक्षा व्यवस्थित र मर्यादित रूपमा सम्पन्न भएको स्पष्ट पारिएको छ। परीक्षाको क्रममा परीक्षा मर्यादा विपरीत कार्य भएको बुझिएपछि एक जना परीक्षार्थीमाथि सामान्य कारबाही गरिएको क्याम्पसले जनाएको छ।
क्याम्पसका अनुसार परीक्षा हलमा हल्लाखल्ला गर्ने तथा धम्की दिने कार्य गरेको विषयमा त्रिभुवन विश्वविद्यालय संगठन तथा शैक्षिक प्रशासनसम्बन्धी नियमको परिच्छेद ६६, दफा २६० बमोजिम सामान्य कारबाही गरिएको थियो। त्यसपछि सम्बन्धित विद्यार्थी, अभिभावक, सम्बन्धित क्याम्पस, प्रहरी प्रशासन तथा त्रिभुवन विश्वविद्यालय परीक्षा नियन्त्रण कार्यालयका सह–परीक्षा नियन्त्रकसमेतको उपस्थितिमा आवश्यक छलफल तथा समझदारी भइसकेको क्याम्पसले जनाएको छ।
