काठमाडौँ । काठमाडौँका विभिन्न सञ्चारमाध्यमका कार्यालयको गेटमा शंकास्पद रूपमा सवारीसाधन पार्किङ गरी पत्रकार तथा सञ्चारकर्मीलाई आवतजावतमा अवरोध पुर्याइएको घटनाप्रति नेपाल पत्रकार महासंघले गम्भीर ध्यानाकर्षण भएको जनाएको छ।
महासंघले सोमबार एक प्रेस विज्ञप्ति जारी गर्दै आज बिहान ७ बजेदेखि तीनकुनेस्थित कान्तिपुर पब्लिकेसन्स, नयाँबानेश्वरस्थित अनलाइनखबर र मध्यबानेश्वरस्थित हिमालय टेलिभिजनको कार्यालय गेटमा बेवारिसे तथा शंकास्पद ढंगले गाडी पार्किङ गरिएको उल्लेख गरेको छ। यसका कारण पत्रकार तथा सञ्चारकर्मीलाई कार्यालय प्रवेश र आवतजावतमा समस्या सिर्जना भएको महासंघको भनाइ छ।
महासंघले उक्त घटनालाई सञ्चारमाध्यमको नियमित कार्यसम्पादन तथा पत्रकारको पेसागत अधिकारमाथिको अवरोधका रूपमा लिँदै तत्काल गाडी हटाई सञ्चारकर्मी र सञ्चारगृहको सुरक्षा सुनिश्चित गर्न सम्बन्धित निकायसँग माग गरेको छ।
विज्ञप्तिमा घटनाको यथाशीघ्र छानबिन गरी दोषीको पहिचान गर्न तथा कानुनी कारबाही अघि बढाउन पनि सरकार र सुरक्षा निकायको ध्यानाकर्षण गराइएको छ। पत्रकारको स्वतन्त्र रूपमा काम गर्ने वातावरणमा कुनै पनि प्रकारको अवरोध स्वीकार्य नहुने महासंघले स्पष्ट गरेको छ।
महासंघका महासचिव रामप्रसाद दाहालद्वारा हस्ताक्षरित विज्ञप्तिमा अवरोध हटाउन तथा घटनाबारे आवश्यक समन्वय गर्न सुरक्षा निकायसँग निरन्तर सम्पर्क र समन्वय भइरहेको समेत जनाइएको छ।
