कनकाई खबर /झापाको घैलाडुबामा एक महिने राजवंशी गम्छा बुन्ने तालिम सम्पन्न भएको छ ।
कनकाईको वडा नं.९,घैलाडुवास्थित कोच राजवंशी साँस्कृतिक संरक्षण तथा पर्यटन प्रवद्र्धन केन्द्रको आयोजना एवं कनकाई नगरपालिकाको आर्थिक सहयोगमा सम्पन्न तालिमबाट विशेष गरी राजवंशी समुदायका महिलाहरु लाभान्वीत भएको बताइएको छ ।
दक्ष जनशक्ति उत्पादन गर्ने उद्येश्यका साथ सिमित कोटामा संचालन गरिएको तालिमबाट सिकेका कुरा व्यवहारमा लागु गर्न राजवंशी समुदायका ६ जना महिलाले तालिममा सहभागीता जनाएको बताइएको छ ।
राजवंशी गम्छा उत्पादन गर्नकालागि सर्वप्रथम धागोलाई चर्खामा बेर्ने र त्यसलाई तानमा राखेर गम्छा बुन्ने तरिकाको बारेमा तालिममा सिकाइएको प्रशिक्षक रनमाया तामाङले जानकारी दिएकी छन् । एक महिने तालिमको मुुख्य प्रशिक्षकका रुपमा तामाङ र सहायक प्रशिक्षकका रुपमा शान्ता लक्सम लिम्बू रहेको जनाइएको छ ।
कोच राजवंशी साँस्कृतिक संरक्षण तथा पर्यटन प्रवद्र्धन केन्द्रका अध्यक्ष प्रेमप्रसाद राजवंशीको अध्यक्षता एवं कनकाई नगरपालिकाकी उपप्रमुख आशा शिवाकोटीको प्रमुख आतिथ्यमा कार्यक्रम सम्पन्न भएको बताइएको छ। समापन विशेष कार्यक्रमलाई सम्बोधन गर्दै उपप्रमुख शिवाकोटीले राजवंशी समुदायको आफ्नो संस्कृति, संस्कार साथै भेषभूषाको संरक्षणका लागि संचालन गरिएको तालिम अत्यन्तै प्रभावकारी भएको ठहर गर्दै राजवंशी गम्छा तालिमलाई थप व्यवस्थित गर्न एडभान्स तालिमको आवश्यक रहेको बताएकी छन् ।
नगर क्षेत्रका महिलाहरुलाई आयआर्जनमा टेवा पुर्याउँने उद्येश्यका साथ महिला लक्षित विभिन्न किसिमका तालिम संचालन गर्दै आएको कनकाई नगरपालिकाले राजवंशी समुदायका महिलाहरुका लागि समेत सोही अनुरुपका कार्यक्रमलाई प्राथमिकताका साथ अघि बढाएको उपप्रमुख शिवाकोटी बताउँछिन् । आगामी दिनमा समेत राजवंशी गम्छा बुन्ने तालिमको थप निरन्तरताका लागि कनकाई नगरपालिकाको तर्फबाट आवश्यक सहयोग हुने उपप्रमुख शिवाकोटीले प्रतिवद्धता जनाएकी छन् ।
आयोजक संस्थाकी कार्यसमिति सदस्य डुमरकुमारी राजवंशीले स्वागत गरेको औपचारिक कार्यक्रममा कनकाई ८ का वडाअध्यक्ष लीलाबहादुर कटुवाल, कार्यपालिका सदस्य सुशिलाबुधनी चौधरी, कनकाई ९ का वडासदस्य एवं कार्यबाहक वडाअध्यक्ष युवराज राजवंशी, वडासदस्यहरु नरमान श्रेष्ठ र तारा दर्नाल, नेकपा एमालेका गोविन्द उप्रेती, नेपाली कांग्रेसका गणेशप्रसाद उप्रेती, रास्वपाका लोकेश सेडाईँ लगायतले शुभकामना मन्तव्य राखेको कार्यक्रमको संचालन कृष्ण बेडारी शर्माले गरेका थिए ।
