काठमाडौं । नेपाली भाषाका आदिकवि भानुभक्त आचार्यको २१३औँ जन्मजयन्ती आज देश तथा विदेशमा विभिन्न कार्यक्रम गरेर मनाइँदैछ ।
भानुभक्तले संस्कृत भाषामा रहेको रामायणलाई नेपालीमा भावानुवाद गरेर सबै नेपालीले बुझ्ने र पढ्न सक्ने बनाएका थिए । त्यसैले उनलाई नेपाली भाषा र साहित्यका महान् स्रष्टाका रूपमा सम्मान गरिन्छ । उनले लेखेको रामायण अहिले पनि धेरै नेपालीका घरमा पाठ गरिन्छ ।
विसं १८७१ असार २९ गते तनहुँको चुँदीरम्घामा जन्मिएका भानुभक्तलाई एक घाँसीको प्रेरणाले राम्रो काम गरेर नाम कमाउनुपर्छ भन्ने भावना जागेको र त्यसपछि उनले रामायण नेपालीमा लेख्न थालेको विश्वास गरिन्छ ।
उनका वधुशिक्षा, प्रश्नोत्तर, भक्तमाला, रामगीता लगायतका कृतिहरू पनि चर्चित छन् । नेपाली भाषा, साहित्य, संस्कृति र राष्ट्रिय एकतामा उनको महत्त्वपूर्ण योगदान रहेको मानिन्छ ।
भानु जयन्तीका अवसरमा आज विभिन्न स्थानमा भानुभक्तको प्रतिमामा माल्यार्पण, प्रभातफेरी, रामायण पाठ तथा साहित्यिक कार्यक्रम आयोजना गरिएको छ । नेपाल प्रज्ञा प्रतिष्ठान, भानु प्रतिष्ठान, नेपाली शिक्षा परिषद् लगायतका संस्थाले पनि विशेष कार्यक्रम गरिरहेका छन् ।
नेपालका साथै भारतको दार्जिलिङ, सिक्किम, भुटान, म्यानमार लगायत नेपाली भाषी बसोबास गर्ने स्थानमा पनि भानु जयन्ती मनाइँदैछ ।
