विराटनगर १३ असार / नेपाल पत्रकार महासंघ अध्यक्ष निर्मला शर्माले पत्रकार महासंघको आन्दोलन नागरिकको सूचना पाउने अधिकारका लागि भएको बताउनु भएको छ । पत्रकार महासंघले विज्ञापनका लागि मात्र नभएर नागरिक स्वतन्त्रताका लागि आन्दोलित हुनु परेको उहाँले बताउनुभयो ।
सरकारले सूचनाको हकमा बन्देज लगाएको अध्यक्ष शर्माले बताउनुभयो । शनिवार विराटनगरमा नेपाल पत्रकार महासंघ कोशी प्रदेशको तेश्रो बार्षिक साधारणसभा उद्घाटन कार्यक्रममा प्रमुख अतिथीको आसनबाट सम्बोधन गर्दै अध्यक्ष शर्माले अहिले सरकार परिवर्तन भएपनि व्यवस्था परिवर्तन जस्तो आभास भएको बताउनुभयो । सरकार अधिनायकवाद तिर लम्केको उहाँको भनाइ छ । अध्यक्ष शर्मालेले भन्नुभयो,‘ संसद, संसद जस्तो छैन । विधिको शासन मिचिएको छ ।’
महासंघले अझ कठोर आन्दोलन गर्ने उहाँले बताउनुभयो । महासचिव रामप्रसाद दाहालले सरकार प्रेस स्वतन्त्रता नियन्त्रणमा लागेको बताउनु भएको छ । सरकारी विज्ञापन सरकारी सञ्चार माध्यम लाई मात्रै दिने विभेदकारी निर्णयले श्रम समस्या बढ्ने र मिडिया बन्दहुने अवस्था आउने बताउनुभयो । नेपाली प्रेसको समस्या विश्वभर पठाईसकिएको उहाँले बताउनुभयो । असार २१ गतेको राष्ट्रिय सम्मेलन पछि महासंघले कठोर आन्दोलनका कार्यक्रम अघि सार्ने उहाँले बताउनुभयो ।
महासंघ कोशी प्रदेश अध्यक्ष भरतबहादुर खड्काको अध्यक्षतामा सम्पन्न बार्षिक साधारणसभामा केन्द्रीय सदस्य कमल रिमाल, प्रदेशका संस्थापक अध्यक्ष विक्रम लुइँटेल, सल्लाहकार लिलाबल्लभ घिमिरे, विवेक गौतम, प्रेस युनियन कोशीका अध्यक्ष मीनकुमार नबोदित, उपाध्यक्ष कुमोद अधिकारी लगायतले सम्बोधन गर्नुभएको थियो ।
