राष्ट्रिय स्वतन्त्र पार्टी (रास्वपा) झापाको प्रथम जिल्ला अधिवेशनबाट ओम भण्डारी जिल्ला सभापतिमा निर्वाचित भएका छन्। तीन जनाबीच भएको प्रतिस्पर्धात्मक निर्वाचनमा भण्डारीले स्पष्ट मतान्तरसहित विजय हासिल गरेका हुन्।
शनिबार सम्पन्न मतदानमा करिब ६५० मत खसेको थियो। प्राप्त मतपरिणामअनुसार भण्डारीले ३४१ मत प्राप्त गर्दै सभापतिमा निर्वाचित भए। उनका निकटतम प्रतिस्पर्धी लक्ष्मण बस्नेतले २४७ मत प्राप्त गरे भने अर्का उम्मेदवार अर्जुनकुमार मैनालीले २५ मत मात्रै पाए।
जिल्ला नेतृत्व चयनका लागि भएको निर्वाचनलाई रास्वपा झापाको संगठन निर्माणसँग जोडेर हेरिएको छ। पार्टी स्थापना भएपछि पहिलोपटक जिल्लास्तरमा नेतृत्व चयनका लागि भएको प्रतिस्पर्धाले कार्यकर्ता र प्रतिनिधिमा उत्साह थपेको थियो।
उपसभापति पदमा पुष्पलाल ढकाल निर्वाचित भएका छन्। ढकालले २१० मत प्राप्त गर्दा उनकी प्रतिस्पर्धी शान्ता तामाङले १९८ मत र लीला खड्काले १११ मत प्राप्त गरिन्। उपसभापति पदमा अत्यन्तै कम मतान्तर देखिएकाले निर्वाचनको प्रतिस्पर्धा रोचक बनेको थियो।
यस्तै सचिव पदमा विरोध सुवेदी ३६८ मतसहित विजयी भए। उनका प्रतिस्पर्धी रविन खड्काले २३५ मत प्राप्त गरे। सहसचिवमा भीम कुँवर ३५२ मतसहित निर्वाचित हुँदा राजेन्द्र बरालले १९३ र लक्ष्मी रेग्मीले ७४ मत प्राप्त गरे।
अधिवेशनअन्तर्गत क्षेत्रीय नेतृत्वसमेत चयन गरिएको छ। झापा क्षेत्र नम्बर १ को सभापतिमा कमल गौतम १०८ मतसहित निर्वाचित भए। क्षेत्र नम्बर ३ मा कमल बानियाँ ४८ मत प्राप्त गर्दै सभापति बने भने क्षेत्र नम्बर ५ मा चुडामणि पाठक ५३ मतसहित निर्वाचित भए। क्षेत्र नम्बर २ मा गोपाल कटुवाल र क्षेत्र नम्बर ४ मा लीलामाया बस्नेत निर्विरोध सभापति चयन भएका थिए।
निर्वाचन प्रक्रिया चलिरहेकै बेला प्रतिनिधि छनोट र वैधानिकतासम्बन्धी विषयलाई लिएर केहीबेर अधिवेशनस्थलमा विवादसमेत भएको थियो। केही प्रतिनिधिबीच भनाभन र घम्साघम्सीको अवस्था सिर्जना भए पनि पछि स्थिति सामान्य बनेको निर्वाचन समितिले जनाएको छ। विवादका बाबजुद मतदान र मतगणना कार्य निर्धारित प्रक्रियाअनुसार सम्पन्न भएको बताइएको छ।
को हुन् ओम भण्डारी ?
नवनिर्वाचित सभापति ओम भण्डारी रास्वपा झापाका सक्रिय तथा परिचित युवा नेताका रूपमा चिनिन्छन्। पार्टीको प्रारम्भिक संगठन विस्तारदेखि नै झापामा सक्रिय भूमिका निर्वाह गर्दै आएका भण्डारीले संगठन निर्माण, सदस्यता विस्तार र स्थानीय तहसम्म पार्टीको पहुँच बढाउन महत्वपूर्ण योगदान दिएका थिए।
रास्वपाको उदयसँगै वैकल्पिक राजनीतिको पक्षमा खुलेर लागेका भण्डारी पार्टीभित्र समन्वयकारी र संगठनमुखी नेताका रूपमा परिचित छन्। विभिन्न सामाजिक तथा राजनीतिक गतिविधिमार्फत जिल्लामा सक्रिय रहँदै आएका उनले पार्टीको स्थानीय संरचना मजबुत बनाउने अभियानमा नेतृत्वदायी भूमिका खेलेका थिए।
अधिवेशनअघि नै उनलाई सभापतिको बलियो दाबेदारका रूपमा हेरिएको थियो। निर्वाचन परिणामले पनि कार्यकर्ता र प्रतिनिधिबीच उनको प्रभाव देखाएको राजनीतिक विश्लेषकहरूको भनाइ छ। उनले प्राप्त गरेको ३४१ मत कुल खसेको मतमध्ये सबैभन्दा बढी हो, जसले उनको पक्षमा रहेको संगठनात्मक समर्थनलाई स्पष्ट पारेको छ।
निर्वाचनपछि प्रतिक्रिया दिँदै भण्डारीले पार्टीभित्रको प्रतिस्पर्धा लोकतान्त्रिक अभ्यास भएको उल्लेख गर्दै अब सबै पक्षलाई समेटेर संगठन निर्माणमा केन्द्रित हुने बताएका छन्। उनले झापामा रास्वपालाई थप सशक्त, व्यवस्थित र जनतामुखी संगठनका रूपमा विकास गर्ने प्रतिबद्धता व्यक्त गरेका छन्।
नवनिर्वाचित नेतृत्वलाई आगामी स्थानीय तथा संघीय निर्वाचनको तयारी, संगठन विस्तार, सदस्यता व्यवस्थापन र जनसमस्यासँग जोडिएका मुद्दामा प्रभावकारी भूमिका निर्वाह गर्ने चुनौतीसमेत रहेको छ। झापामा रास्वपाको संगठन वि
