कनकाई खबर /झापाको कनकाई–५ बेनुबाजाका २६ वर्षीय उमेश खाती, जो वैदेशिक रोजगारीका क्रममा महिनादिनअघि दुबै हातखुट्टा गुमाउन बाध्य भए, अहिले समाजको सामूहिक सहयोगले जीवनमा नयाँ ऊर्जा पाएका छन्।
लायन्स क्लव अफ कनकाई सुरुङ्गा, दुर्गापुर तथा लायन्स क्लव इन्टरनेशनल ३२५ सी का सदस्यहरूले संयुक्त रूपमा नगद ५१ हजार रुपैयाँ सहयोग हस्तान्तरण गरेका छन्। लायन्स क्लव इन्टरनेशनल ३२५ सी वर्ष २०२६/२७ का गर्भनर तथा कनकाई क्लवका संस्थापक अध्यक्ष लीला चिमरियाले उमेशको घरमै पुगेर विशेष कार्यक्रम आयोजना गर्दै रकम हस्तान्तरण गरे। कार्यक्रममा उनले यसै वर्षभित्र हातखुट्टा गुमाएका व्यक्तिहरूका लागि निःशुल्क कृत्रिम हातखुट्टा लगाउने क्याम्प सञ्चालन गर्ने योजना रहेको जानकारी दिए ।
मानवीय सेवामा समर्पित चिमरियाले उमेशलाई निरन्तर सहयोग गर्ने वाचा गर्दै भने, æहामी तपाईं मात्र होइन, तपाईं जस्तै सयौं पीडितलाई पुनः जीवनमा आशा जगाउने प्रयास गर्छौं।Æ
कार्यक्रममा उमेशले आफ्ना भावनाहरू पोख्दै भने, æपहिले हातखुट्टा गुमाउँदा म अत्यन्तै निराश थिएँ। तर अहिले सबैको साथ, सहयोग र मायाले मलाई फेरि बाँच्ने ऊर्जा दिएको छ।Æ उनका शब्दहरूले उपस्थित सबैलाई भावुक बनायो।
यस अवसरमा कनकाई क्लवका पूर्व अध्यक्षहरू रुपनारायण खतिवडा, रमेश, मनोज बस्नेत, साजन थापा, दुर्गापुर क्लवका अध्यक्ष भुवन खतिवडा लगायतको सहभागिता थियो। कार्यक्रम केवल आर्थिक सहयोगको हस्तान्तरण मात्र नभई, मानवीय संवेदनाको गहिरो अभिव्यक्ति बन्यो।
विदेशमा रहेका नेपालीहरूले पनि उमेशको भविष्य उज्यालो बनाउन हात बढाएका छन्। हाल बेल्जियममा रहेका शिव दाहालले उमेशकी छोरीको शिक्षा खर्च व्यहोर्ने घोषणा गरेका छन् । साथै, अन्य दाताहरूले स्वदेश तथा विदेशबाट रकम सहयोग गर्दै निरन्तर साथ दिइरहेका छन्।
यो घटनाले देखाएको छ कि कठिन परिस्थितिमा पनि समाजको सामूहिक सहयोगले जीवनमा नयाँ अध्याय सुरु गर्न सकिन्छ। उमेशको संघर्ष केवल व्यक्तिगत कथा होइन, यो हजारौं नेपाली युवाको प्रतिनिधित्व हो, जो रोजगारीका लागि विदेश जान्छन् तर कहिलेकाहीँ नसोचेको दुर्घटनामा पर्ने गर्छन् ।
लायन्स क्लवको यो पहलले उमेशलाई मात्र होइन, अन्य पीडितहरूलाई पनि आशा दिलाएको छ। समाजको सामूहिकता र मानवीयता अझै जीवित छ भन्ने प्रमाण लायन्सको यस किसिमको सहकार्यले देखाएको छ ।
