कनकाई खबर / झापाको सुरुङ्गास्थित प्यारागन एकाडेमीले यस वर्षको एसईई परीक्षामा नगरकै उत्कृष्ट नतिजा ल्याउँदै कनकाई नगर क्षेत्रको शैक्षिक गौरव बनेको छ।
विद्यालयका विद्यार्थी सुभम तिम्सिनाले सर्वोत्कृष्ट जिपिए ४ ल्याएर नगरकै अब्बल विद्यार्थीको उपाधि हात पारेका छन्। विद्यालयका प्रिन्सिपल दीपक भट्टराईका अनुसार यस वर्ष ५२ जना विद्यार्थी परीक्षामा सहभागी भएका थिए, जसमा ८ जनाले ए±, ३० जनाले ए र ९ जनाले बि± ल्याउन सफल भएका छन् \
प्यारागन एकाडेमीले विगतका वर्षहरूमा पनि निरन्तर उत्कृष्ट नतिजा हासिल गर्दै आएको छ, जसले विद्यालयको शैक्षिक रणनीति, विद्यार्थीहरूको अनुशासन, शिक्षकहरूको समर्पण र अभिभावकहरूको सहकार्यलाई उजागर गर्छ। नियमित परीक्षा, शिक्षक प्रशिक्षण, विद्यार्थी अनुशासन र अभिभावक सहकार्यलाई प्राथमिकता दिने विद्यालयले यस वर्ष फेरि नगरकै शैक्षिक शिखरमा आफ्नो नाम अंकित गरेको बताइएको छ।
विद्यालयको प्रशासनिक जिम्मेवारी, अनुभवी शिक्षाविद् दीपक भट्टराईले सम्हाल्दै आएका छन्। उनका अनुसार विद्यालयले २०६७ सालदेखि नै तत्कालीन एसएलसीमा विद्यार्थी सहभागी गराउँदै आएको छ र प्रत्येक नतिजाले नयाँ कृतिमान कायम गर्दै आएको विद्यालयकी संस्थापक अध्यक्ष चम्पा खनाल सुवेदी बताउँछिन् । यसले संस्थापक प्रिन्सिपल स्व. लक्ष्मण सुवेदीको सपनालाई सार्थकता दिलाएको विश्वास गरिएको छ।
