कनकाई खबर / झापाको सुरुङ्गास्थित कनकाई माध्यमिक विद्यालयको खेल मैदानमा जिल्लास्तरीय पालिका पुरुष फुटबल प्रतियोगिता-कनकाई कप)को आठौं संस्करण आज शनिबारदेखि सुरु हुने भएको छ ।
आज बैशाख २६ गते शनिबारदेखी सुरु भइ जेठ ६ गते सम्पन्न हुने प्रतियोगिता कनकाई माध्यमिक विद्यालयको खेलमैदानमा संचालन हुने भएको हो । प्रतियोगिताको उद्घाटन खेल आयोजक कनकाई नगरपालिका र गौरीगञ्ज गाउँपालिका बीच हुने बताइएको छ। प्रतियोगिताका लागि जिल्लाका १५ वटै पालिकामा पत्र पठाएको भएपनि ६ वटा नगरपालिका र ६ वटै गाउँपालिका गरि १२ पालिकाको १२ टिम मात्रै सहभागी हुने तयारी भएको प्रतिष्ठानका अध्यक्ष छबि थपलियाले जानकारी दिए ।
खेलकुदमार्फत राष्ट्र विकासको अभियान – मूल नाराका साथ २०७१ सालमा स्थापना भएको कनकाई खेलकुद प्रतिष्ठानले खेलकुदका विविध गतिविधिहरू गर्दै आएको र यसलाई निरन्तरता दिँदै झापा जिल्ला पालिका स्तरीय पुरुष फुटबल प्रतियोगिताको आठौं संस्करण २०८३ संचालन गर्न लागिएको प्रतिष्ठानका अध्यक्ष थपलियाले जानकारी दिए ।
कनकाई नगरपालिकाको मुख्य सहयोग रहेको प्रतियोगिता सम्पन्न गर्नको लागि प्रतिष्ठानका कोषाध्यक्ष डम्बरप्रसाद फुयालको संयोजकत्वमा आर्थिक व्यवस्थापन उपसमिति , सचिव रामप्रसाद निरौलाको संयोजकत्वमा प्रचारप्रसार तथा कार्यक्रम व्यवस्थापन उपसमिति , सदस्य राजेश अघोरीको संयोजकत्वमा खेलमैदान तथा स्टेज व्यवस्थापन उपसमिति , चित्रा श्रेष्ठको संयोजकत्वमा अतिथि सत्कार व्यवस्थापन उपसमिति गठन गरी जिम्मेवारी प्रदान गरिएको बताइएको छ ।
खेल सौहार्दपूर्ण वातावरणमा सम्पन्न गर्नको लागि र खेल अवधिमा हुनसक्ने सम्भावित समस्याहरू सहजीकरणको लागि फुटबल प्रशिक्षक समेत रहेका दिलकुमार कार्कीको संयोजकत्वमा प्रतिष्ठानका संस्थापक अध्यक्ष ज्योतिकुमार उप्रेती र खेल प्रशिक्षक लिलु गिरी सदस्य रहेको सहजीकरण उपसमिति समेत तय गरिएको छ ।
प्रतियोगितामा आयोजक कनकाई नगरपालिका, गौरीगञ्ज गाउँपालिका , हल्दिबारी गाउँपालिका , बिर्तामोड नगरपालिका , बाह्रदशी गाउँपालिका , कमल गाउँपालिका , अर्जुनधारा नगरपालिका ,गौरादह नगरपालिका , शिवसक्षी नगरपालिका , बुद्धशान्ति गाउँपालिका , भद्रपुर नगरपालिका र झापा गाउँपालिका गरी झापाका १५ वटा पालिकामध्ये १२ वटा पालिकाको सहभागिता रहेको र विशेष कारण तीनवटा पालिकाले सहभागिता जनाउन नसकेको संस्थाका सचिव रामप्रसाद निरौलाले जानकारी दिए ।
प्रतियोगिताको प्रथम पुरस्कार राशि १लाख २० हजार दोस्रो पुरस्कार राशि ७५ हजार साथै ट्रफी , मेडल र प्रमाणपत्र रहेको प्रतिष्ठानका कोषाध्यक्ष डम्बरप्रसाद फुयालले जानकारी दिए । प्रतियोगिताका विधागततर्फ उत्कृष्ट गोलकिपर , सर्वाधिक गोलकर्ता, उत्कृष्ट डिफेन्स र उत्कृष्ट मिडफिल्डरले नगद ३ हजार एक सय प्राप्त गर्नेछन् भने म्यानअफ द सिरिजले ५ हजार एक सय प्राप्त गर्नेछन् । त्यस्तै प्रतियोगितामा हरेक खेलको मेन अफ दि म्याचलाई समेत पुरस्कारको व्यवस्था गरिएको कोषाध्यक्ष फुयालले जानकारी गराए ।
झापा जिल्लाकै उच्च स्तरको प्रतियोगिताको रुपमा कनकाई कपलाई थप व्यवस्थित गर्दै यसलाई निरन्तरता दिँदै अघि बढ्नुपर्नेमा प्रतिष्ठानका संस्थापक अध्यक्ष ज्योती उप्रेतीले जोड दिए । प्रतिष्ठानले जिल्ला स्तरीय महिला फुटबल प्रतियोगिता, कनकाई सन्थाल मेला, कनकाई कप, वडास्तरीय खेलकुदका गतिविधिहरुः फुटबल,क्रिकेट,भलिबल लगायतका प्रतियोगिताहरू सञ्चालन गर्दै आइरहेको बताइएको छ ।
वैशाख २६ गते उद्घाटन खेल आयोजक कनकाई नगरपालिका र गौरीगञ्ज गाउँपालिका बीच हुने बताइएको छ । दिउँसोको ठिक २ः३० बजेदेखि औपचारिक कार्यक्रम साथै ३ बजेदेखि खेल सञ्चालन गर्ने गरी समयको व्यवस्थापन गरिएको बताइएको छ । उद्घाटन समारोहका प्रमुख अतिथि कनकाई नगरपालिकाका नगरप्रमुख राजेन्द्रकुमार पोखरेलले प्रतियोगिताको उद्घाटन गर्ने जनाइएको छ ।
प्रतिष्ठानका अध्यक्ष थपलियाको अध्यक्षता एवं सचिव निरौलाले सहजीकरण गरेको पत्रकार सम्मेलनमा प्रतियोगिताको सहजीकरण समितिका संयोजक समेत रहेका खेल प्रशिक्षक दिलकुमार कार्कीले प्रतियोगिताको बारेमा सुझाव सहित सफलताको शुभकामना दिएका थिए ।
