कनकाई खबर/ स्वार्थ भन्दा माथी सेवा भन्ने सिद्धान्तलाई आत्मसाथ गर्दै विश्वव्यापी रुपमा सामाजिक क्रियाकलाप गर्दै आइरहेको अन्तर्राष्ट्रिय स्तरको सामाजिक संस्था रोटरी क्लब अफ सुरुङ्गाले रक्तदान कार्यक्रम सम्पन्न गरेको छ ।
क्लवको वार्षिक क्यालेण्डरका रुपमा सम्पन्न रक्तदानमा ८ महिला सहित ३३ जनाले रक्तदान गरेको क्लवका अध्यक्ष डिल्लीराम मैनालीले जानकारी दिए । रगतको अभावलाई पूरा गर्न क्लवले रक्तदान कार्यक्रमलाई आफ्नो वार्षिक क्लालेण्डरका रुपमा व्यवस्था गरेको अध्यक्ष मैनाली बताउँछन् ।
विभिन्न सेवाका क्षेत्रमा सदस्यलाई जिम्मेवारी प्रदान गरेको रोटरीले सर्भिस प्रोजेक्ट अन्तर्गत रक्तदान कार्यक्रम सम्पन्न गरेको हो । रोटरी एवं रोट्रयाक्ट क्लव अफ सुरुङ्गाको संयुक्त आयोजना रहेको कार्यक्रम कनकाई—३ सुरुङ्गास्थित कुमुदिनी भवनमा सम्पन्न भएको हो ।
क्लवका अध्यक्ष मैनालीको सभापतित्व एवं कनकाई नगरपालिकाका मेयर राजेन्द्रकुमार पोखरेलको प्रमुख आतिथ्य रहेको कार्यक्रममा स्थानीय कनकाई ३ का वडाअध्यक्ष युवराज चम्लागाई सहित वडासदस्यहरु अनिल गोयल र गोविन्द सुवेदी साथै क्रियाशिल संघसंस्थाका प्रमुख तथा प्रतिनिधिहरुको समेत उपस्थिती रहेको बताइएको छ ।
त्यस्तै क्लवका पुर्व अध्यक्षहरु कुमारमणि पोखरेल, टिकाप्रसाद जमरकट्टेल, सुशिलकुमार श्रेष्ठ, खेमप्रसाद प्रसाई, शिवकुमार कडेल, निवर्तमान अध्यक्ष लुबराज उप्रेती सहित अन्य पदाधिकारी तथा सदस्यहरु साथै रोट्रयाक्ट क्लव अफ सुरुङ्गाका अध्यक्ष डा. मुकेश शाह, पुर्व अध्यक्ष सारिका गिरी , ईन्ट्रयाक्ट क्लव अफ सुरुङ्गाका अध्यक्ष डेनिश उप्रेती सहित पदाधिकारी एवं सदस्यहरुको समेत बाक्लो उपस्थिती रहेको बताइएको छ ।
कार्यक्रमलाई सम्बोधन गर्दै कनकाई नगरपालिकाका मेयर पोखरेलले रोटरी क्लवका सदस्यहरुले रोटरीवादको मूल आदर्शलाई मन, वचन र कर्मले मनन गरी समाजमा विभिन्न रचनात्मक मानवीय हितकालागी गरेको सेवामूलक कार्यहरुप्रति आँफू अत्यन्तै प्रभावित भएको बताए ।
निस्वार्थ ढंगले सेवाका क्षेत्रमा काम गर्ने संस्था रोटरी क्लवसँग कनकाई नगरपालिकाले हरेक क्षेत्रमा समन्वय गरेर काम गर्न चाहेको कनकाई नगरपालिकाका मेयर पोखरेलले बताए । पोखरेलले रोटरीबाट समाजमा क्रियाशिल अन्य संघसंस्थाले समेत समन्वय गरेर अघि बढ्न सकेमा सामाजिक एकता कायम हुने विश्वास व्यक्त गरे ।
नेपाल रेडक्रस सोसाइटी रक्तसंचार सेवा झापाको प्राविधिक सहयोग रहेको कार्यक्रममा रोट्रयाक्ट क्लव अफ सुरुङ्गाका प्रेसिडेन्ट डा. मुकेश शाहले स्वागत सहित कार्यक्रमको औचित्यमाथि प्रकाश पारेको रोटरी क्लवका सचिव रामप्रसाद निरौलाले जानकारी दिए ।
