कनकाई खबर \ झापा जिल्लामा पहिलो पटक आयोजना हुन लागेको आमा सेमिनार कार्यक्रमले सामाजिक चेतना, पारिवारिक सम्बन्ध र मानवीय सेवाको महत्वलाई नयाँ आयाम दिने तयारी गरेको छ।
मानव सेवा आश्रम, मानवता प्रवद्र्धन महाअभियान शाखा कार्यालय मेचीनगर–४ द्वारा आयोजित यस दुई दिने सेमिनारले समाजमा बढ्दो तिक्ततालाई न्यूनिकरण गर्दै प्रेम, करुणा र अनुशासनको संस्कारलाई बलियो बनाउने लक्ष्य लिएको छ। सेमिनारको सहजीकरण संस्थाका संस्थापक केन्द्रिय अध्यक्ष रामजी अधिकारीले गर्नेगरी कार्यक्रमको तय भएको जनाइएको छ ।
पत्रकार सम्मेलन मार्फत आयोजकहरूले जानकारी दिएअनुसार, कार्यक्रम चैत १७ गते दिउँसो १ देखि ३ बजेसम्म कनकाई नगरपालिका–३ सुरुङ्गास्थित कनकाई उद्योग वाणिज्य संघको सभाहलमा सुरु हुनेछ। त्यसपछि चैत १८ गते बिहान ७ देखि ९ बजेसम्म मेचीनगर–६ काँकरभिट्टास्थित मेची सामुदायिक हलमा विद्यार्थीलाई लक्षित गरी सेमिनार हुनेछ। सोही दिन बिहान ११ देखि १ बजेसम्म अन्य समुदायलाई लक्षित कार्यक्रम र दिउँसो ४ देखि ५ बजेसम्म बाहुनडाँगी सामुदायिक हलमा विभिन्न समूहलाई लक्षित सेमिनार सञ्चालन गरिनेछ।
कार्यक्रमका प्रमुख उद्देश्यहरूमा बाबा–आमाको महत्व र महिमा बोध गराउने, राष्ट्र र मातृभूमिप्रतिको सम्मान बढाउने, व्यक्तिगत सिर्जनशीलता र सामाजिक मूल्य मान्यता प्रवर्द्धन गर्ने लगायतका विषयहरू समावेश छन्। साथै, अहंकार, रीस, घमण्ड, लोभ जस्ता नकारात्मक भावनालाई कम गर्दै दया, स्नेह, प्रेम र करुणा जस्ता सकारात्मक आचरणलाई प्रोत्साहन गर्ने लक्ष्य राखिएको छ।
पत्रकार सम्मेलनमा आश्रमका कोशी प्रदेश संयोजक एवं केन्द्रिय सदस्य गंगाकुमारी थापासहित अभिभावक गोपाल खरेल, साधिका प्रतिक्षा ढुङ्गेल र अनिता खरेल लगायतको उपस्थिती रहेको जनाइएको छ ।
