कनकाई खबर \ झापाको कनकाई २ स्थित सरस्वती माध्यमिक विद्यालयको व्यवस्थापन समितिको अध्यक्षमा पशुपति आचार्य सर्वसम्मत रुपमा चयन भएका छन् ।
विद्यालय व्यवस्थापन समितिको बुधबार बसेको बैठकले आचार्यलाई अध्यक्षका रूपमा सर्वसम्मत चयन गरेको हो । गत माघ महिनाको ८ गते विद्यालय व्यवस्थापन समितिका अध्यक्ष शिक्षा सेवी एवं सामाजिक व्यक्तित्व ताराप्रसाद खनालको स्वर्गारोहण भएसँगै रिक्त रहेको अध्यक्षको जिम्मेवारीमा आचार्य सर्वसम्मत चयन भएका हुन् ।
विद्यालय व्यवस्थापन समितिकी जेष्ठ सदस्य गीता ओलीको अध्यक्षतामा बसेको बैठकले व्यवस्थापन समितिको तीन वर्षे कार्यकालको बाँकी रहेको समयका लागि आचार्यलाई सर्वसम्मत रुपमा चयन गरिएको विद्यालयका प्रधानाध्यापक नारायणप्रसाद अधिकारीले जानकारी दिए ।
आचार्यले विगत लामो समयदेखि यसै विद्यालयमा रहेका विभिन्न समिति एवं उपसमितिमा कार्यरत रहँदै ईमान्दारीताका साथ आफ्नो कार्य सम्पादन गर्दै आएका थिए । वर्तमान शिक्षक अभिभावक संघका अध्यक्ष समेत रहेका आचार्यलाई शिक्षा सेवाका क्षेत्रमा निस्वार्थ एवं ईमान्दारीताका साथ देखाएको सक्रियताका कारण व्यवस्थापन समितिले उनलाई नयाँ सदस्यका रूपमा चयन गर्दै पछिल्लो समय थप अध्यक्षको जिम्मेवारीमा सर्वसम्मत रुपमा चयन गरेको विद्यालयका शिक्षक एवं युवा साहित्यकार सूर्यप्रसाद अधिकारीले जानकारी दिए ।
