कनकाई खबर / झापाको कनकाई ७, कालिमुडास्थित महाकालेश्वर शिवालय मन्दिरमा श्रीमदभागवत सप्ताह ज्ञान महायज्ञ सुरु भएको छ ।
फागुन ६ गते बुधबार(आज) महायज्ञस्थलबाट पवित्र कनकाई माइसम्म विशेष कलश यात्रा सहित सुरुवात गरिएको सप्ताह ज्ञान महायज्ञ १३ गते बुधबार समापन हुने बताइएको छ । महायज्ञको प्रमुख कथा वाचकमा पं.दिननाथ मिश्र र उपवाचकमा पं.दिपक मिश्र रहेका छन् । मन्दिर सञ्चालन साथै भवन निर्माणको पवित्र उद्येश्यका साथ आयोजना गरिएको महायज्ञमा हरेक दिन देवलीला(झाँकी) सहित विभिन्न ताण्डव नृत्य प्रस्तुत गरिने आयोजक संस्थाका अध्यक्ष प्रेमप्रसाद भण्डारीले जनाएका छन् ।
महाकालेश्वर शिवालय मन्दिर व्यवस्थापन समितिले आयोजना गरेको महायज्ञ सम्पन्न गर्न सामाजिक व्यक्तित्व एवं कनकाई ३ का पुर्व वडाअध्यक्ष रुद्रप्रसाद चिमरीयाको अध्यक्षतामा महायज्ञ मूल समारोह समिति गठन गरिएको छ । महायज्ञ सम्पन्न गर्न विभिन्न उपसमिति समेत गठन गरिएको छ । स्थानीय सामाजिक व्यक्तित्व यादवप्रसाद उप्रेती संयोजक रहेको आर्थिक व्यवस्थापन उपसमिति रहेको छ भने अतिथि सत्कार, स्वयंसेवक परिचालन, शिक्षा तथा संचार लगायत विभिन्न उपसमिति गठन गरिएको महायज्ञ आयोजक समितिका सचिव भिष्म उप्रेतीले जानकारी दिए । कलशयात्रा सम्पन्नपछि एक विशेष समारोहका वीच महायज्ञ समुद्घाटन गरिएको हो ।
मूल समारोह समितिका अध्यक्ष चिमरीयाको अध्यक्षतामा सम्पन्न उद्घाटन विशेष कार्यक्रममा सिद्धशक्ति योगधामका साद्वी माता राजराजेश्वरी (सीता भारद्वाज) को प्रमुख आतिथ्य रहेको थियो । आयोजक संस्थाका अध्यक्ष प्रेमप्रसाद भण्डारीले स्वागत सहित औचित्यमाथि प्रकाश पारेको कार्यक्रममा सिद्धशक्ति योगधाम इलाम पशुपति नगरका अध्यक्ष साद्वी रेणुका उप्रेती, कनकाई ७ का वडाअध्यक्ष भिष्म सिटौला लगायतले शुभकामना मन्तव्य राख्दै महायज्ञको सफलताको कामना गरेका थिए ।
सञ्चारकर्मी रामप्रसाद निरौलाले संचालन गरेको औपचारिक कार्यक्रममा विभिन्न सामाजिक संघसंस्था प्रमुख तथा प्रतिनिधिहरु, चन्दादाता, अक्षयकोष दाता सहित स्थानीय मातृशक्तिको उल्लेख्य सहभागीता रहेको आयोजक संस्थाका सचिव दिपक कार्कीले जानकारी दिएका छन् ।
