कनकाई खबर \ झापाको कनकाई पुलमा बम जस्तो देखिने शंकास्पद वस्तु डिस्पोज भएको छ ।
मंगलबार आज बिहानै पूर्व–पश्चिम राजमार्गअन्तर्गत पर्ने कनकाई पुलको पश्चिमी भागतर्फ उक्त वस्तु देखिएको थियो । चारालीस्थित नेपाली सेनाको अरिदमन गणबाट तत्काल आएको बम डिस्पोजल टोलीले शंकास्पद बस्तु डिस्पोज गरेको बताइएको छ ।
राजमार्ग हुँदै आवतजावत गर्ने सवारी साधनका चालक तथा यात्रुहरूले पुलको मुख नजिकै शंकास्पद वस्तु देखेपछि तत्काल प्रहरीलाई खबर गरेका थिए। सूचना प्राप्त हुनासाथ प्रहरी टोली घटनास्थलमा पुगेको थियो । सोही समयमै घटनास्थलमा पुगेको नेपाली सेनाको सक्रियतामा तत्काल शंसकास्पद बस्तु डिस्पोज गरेको जनाइएको छ ।
पुलको प्रवेशद्वारमै शंकास्पद वस्तु फेला परेपछि सम्भावित जोखिमलाई ध्यानमा राख्दै प्रहरीले सो क्षेत्रमा सवारी साधनको आवतजावत रोक लगाएको थियो । यात्रु तथा सर्वसाधारणलाई सुरक्षित दूरीमा रहन भनेपछि कनकाई माइको पुल पुर्व पश्चिममा सवारी साधन जाम भएका थिए ।
शंकास्पद वस्तु कसले र किन राखेको भन्ने विषयमा केही खुल्न नसकेको र आवश्यक अनुसन्धान सुरु गरिएको प्रहरीले जनाएको छ ।
