कनकाई खबर \ झापाको बिर्तामोडमा एक विशेष समारोहका बीच १५जेनजी युवालाई ‘पौरखी जेनजी सम्मान’ प्रदान गरिएको छ ।
काजी मिडिया एन्ड टेक्नोलोजी प्रालिले एक विशेष कार्यक्रमका बीच विभिन्न क्षेत्रबाट समाजमा सकारात्मक परिवर्तनको सन्देश फैलाएको भन्दै झापाका १५ जेनजी युवालाई ‘पौरखी जेनजी सम्मान’ प्रदान गरिएको हो । सोही अवसरमा लोकतन्त्र पोष्टद्वारा प्रकाशित ‘पौरखी जेनजी’ विशेष म्यागजिन–२०८२ को लोकार्पण गरिएको छ ।
सामाजिक अभियन्ता तथा राष्ट्रिय सहकारी बैङकका अध्यक्ष महेन्द्रकुमार गिरीको संयोजकत्वमा गठित छनोट समितिले जिल्लाभरिबाट छनोटमा परेका १५४ जना जेनजी उमेर समूहका युवाहरु मध्ये विभिन्न क्षेत्रका १५ जनालाई सम्मानका लागि चयन गरेको हो। म्यागजिनमा उनीहरूको संघर्ष, श्रम, सिर्जनशीलता र सफलताको कथा समेटिएको लोकतन्त्र पोष्टका प्रधान सम्पादक मोहनकाजी न्यौपानेले जानकारी दिए ।
प्रधान सम्पादक काजीले जेनजी पुस्ताबाट प्रेरणा प्रदान गर्ने र समाजमा सकारात्मक धारणा प्रवाह गर्ने उद्देश्यका साथ यस वर्षको म्यागजिनमा सोही पुस्तालाई प्राथमिकतामा राखिएको जानकारी दिए। “पौरखी जेनजी केवल म्यागजिन होइन, आफ्नै माटोमा पसिना बगाएर सम्भावना सिर्जना गरिरहेका युवाको आन्दोलनको दस्ताबेज हो”, उनले भने, “जेनजीलाई नकारात्मक दृष्टिले होइन, परिवर्तनको संवाहकका रूपमा प्रस्तुत गर्नु हाम्रो उद्येश्य हो।”
यसरी सम्मानित हुनेहरुमा ‘कन्टेन्ट क्रिएटर’ स्वेता बुढाथोकी, वन्यजन्तु संरक्षक कृपेश कार्की, कराँते खेलाडी कृपा चापागाईं, डा.चेतनराज कार्की, गायिका रचना रिमाल, नवप्रवर्तनकर्ता सबिन बास्कोटा, गायक तथा कलाकार अशोक दर्जी, उद्यमी कृपा ढकाल, धार्मिक अभियन्ता हरिकृष्ण भण्डारी, पर्वतारोही जयराम दाहाल, फुटबलर अनन्त तामाङ, अभियन्ता तनुजा पाण्डे, क्रिकेटर अङ्कित सुवेदी, नवप्रवर्तन समूह राहुल–तेज–उत्सव तथा कला क्षेत्रमा सक्रिय मनिषा राजवंशी रहेका छन्।
सम्मानित सबैलाई कार्यक्रमका प्रमुख अतिथि राष्ट्रिय सहकारी बैङकका अध्यक्ष गिरी, प्रधान सम्पादक काजी, काजी मिडिया एन्ड टेक्नोलोजी प्रालिका संचालक अम्बिका भण्डारी र नेपाल पत्रकार महासंघ झापाका अध्यक्ष एकराज गिरीले संयुक्त रूपमा सम्मान गरेका थिए ।
महासंघ झापाका अध्यक्ष गिरीले शुभकामना मन्तव्य राख्दै लोकतन्त्र पोष्टले पत्रकारिता, सामाजिक चेतना र लोकतान्त्रिक मूल्य प्रवद्र्धनमा निर्वाह गरेको भूमिकाको प्रशंसा गरेका थिए। सम्मानित युवाहरूले आफूहरूलाई प्रदान गरिएको सम्मानले थप जिम्मेवारी बोध गराएको प्रतिक्रिया दिए ।
प्रालिका संचालक चन्द्रकला भण्डारीको अध्यक्षतामा सम्पन्न कार्यक्रममा कार्यकारी सम्पादक दामोदर ढुङ्गेलले स्वागत सहित औचित्यमाथि प्रकाश पारेका थिए । सम्मानितहरूको तर्फबाट स्वेता बुढाथोकी र सेवन कार्कीले आआफ्नो अनुभूती मन्तव्य राखेको कार्यक्रमको सहजीकरण महासंघका निवर्तमान उपाध्यक्ष केशव भट्टराईले गरेका थिए ।
