कनकाई उद्योग वाणिज्य संघको अध्यक्षमा जनक कार्की
कनकाई खबर \ नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतले राजनीतिक अस्थिरता र प्राकृतिक विपत्तिका कारण निजी क्षेत्र गम्भीर संकटमा परेको भन्दै सरकारले व्यवसायीहरुको मर्म बुझ्न नसकेको आरोप लगाएका छन्।
कनकाई उद्योग वाणिज्य संघको ११औं साधारण सभा तथा चौथो अधिवेशनमा प्रमुख अतिथीको आसनबाट सभालाई सम्बोधन गर्दै अध्यक्ष राउतले पछिल्लो समय जेनजीका नाममा भएको विध्वंसले आन्तरिक तथा बाह्य पर्यटनमा गिरावट ल्याएको उल्लेख गरे । उनले व्यवसायीहरुको समस्या दिनप्रतिदिन गहिरिँदै गएको भन्दै राज्यले संवेदनशीलता देखाउनुपर्नेमा जोड दिए ।
संघका प्रदेश अध्यक्ष राउतले भने, “राजनीतिक स्थिरता नभएकै कारण निजी क्षेत्र ठूलो संकटमा छ। व्यवसायीहरुले रोजगारी सिर्जना, कर संकलन तथा आर्थिक विकासमा योगदान पुर्याइरहेका छन् तर राज्यबाट आवश्यक सहयोग र प्रोत्साहन पाउन सकेका छैनन्।”
कनकाई उद्योग वाणिज्य संघको सभाहलमा सम्पन्न साधारण सभा तथा चौथो अधिवेशनले युवा व्यवसायी जनक कार्कीको अध्यक्षमा सर्वसम्मत नेतृत्व चयन गरेको छ । सुरुङ्गा जेसीज सहित विभिन्न सामाजिक संघसंस्थाको सफल नेतृत्व सम्हालीसकेका कार्कीले कनकाई उद्योग वाणिज्य संघमा समेत यस अघि विभिन्न जिम्मेवारी सम्हाल्दै व्यवसायीहरुको सुख, दुखमा हातेमालो गर्दै आएका थिए । पछिल्लो समय प्राविधिक समस्याका कारण संस्थामा उत्पन्न जटिल परिस्थितीलाई सहजीकरण गर्न कार्यबाहक अध्यक्षको जिम्मेवारी काँधमा लिएर कार्कीले संस्थालाई सहि मार्गनिर्देशन गर्न सफल भएको बताइएको छ ।
अध्यक्षमा सर्वसम्मत चयन भएका कार्कीसँगै वरिष्ठ उपाध्यक्षमा सरोज सिटौला, वाणिज्य उपाध्यक्षमा डिल्लीराम पौडेल र उद्योग उपाध्यक्षमा टिकाराम बराल, महासचिवमा सोमनाथ उप्रेती, कोषाध्यक्ष राजकुमार शाह, वाणिज्य सचिवमा शान्ता अधिकारी र उद्योग सचिवमा सागर ओली चयन भएको निर्वाचन समितिका संयोजक कुमारमणी पोखरेलले जानकारी दिए ।
संघको खुल्ला सदस्यहरुमा क्रमशः रमेश भट्टराई , दिपेन्द्र थपलिया , शंकर मैनाली, दुर्गाप्रसाद पाठक , महेन्द्र मैनाली ,मानबहादुर दाहाल , तिलक श्रेष्ठ र महिला सदस्यमा निर्मला चामलिङ राई , लक्ष्मी बस्नेत र चित्रा श्रेष्ठ चयन भएको निर्वाचन समिति संयोजक पोखरेलले बताए ।
सर्वसम्मत नेतृत्व चयनका लागि महासंघ कोशी प्रदेशका उपाध्यक्ष एवं कनकाई उद्योग वाणिज्य संघका पूर्व अध्यक्ष कुमारमणि पोखरेलको संयोजकत्वमा शिक्षासेवी एवं रोटरी क्लव अफ सुरुङ्गाका संस्थापक अध्यक्ष एलपी उप्रेती र सिंहदेवी माविका पुर्व प्रधानाध्यापक डम्बरप्रसाद फुयाल सदस्य रहेको निर्वाचन मण्डलले भूमिका खेलेको बताइएको छ ।
संघका कार्यबाहक अध्यक्ष जनक कार्कीको अध्यक्षतामा सम्पन्न साधारण सभामा अध्यक्ष कार्कीले संस्थाको संगठनात्मक गतिविधि, चुनौती सहित भावी योजना समेटिएको अध्यक्षको प्रतिवेदन प्रस्तुत गरेका थिए ।
त्यस्तै संघका महासचिव सरोज सिटौलाले संघले आर्थिक वर्ष २०७८ \०७९, २०७९ \०८० , २०८० \०८१ र २०८१\०८२ अवधिमा सम्पन्न गरेका गतिविधि सहित कार्यक्रमहरू समावेश गरी तयार गरिएको महासचिवको वार्षिक प्रतिवेदन प्रस्तुत गरेका थिए ।
संघका कोषाध्यक्ष राजकुमार शाहले संघको आर्थिक वर्ष २०७८ \०७९, २०७९ \०८०, २०८० \०८१, २०८१ \०८२ सम्मको आर्थिक प्रतिवेदन सभामा पेश गरेका थिए । संघका कार्यवाहक अध्यक्ष, महासचिव र कोषाध्यक्ष सहित तीन जनाकै प्रतिवेदन माथि बन्द सत्रले व्यापक छलफल गरी पारित समेत गरेको बताइएको छ। साधारण सभाकै अवसरमा संघले आफ्नो भवन परिसरमा स्थापना गरेको मण्डपको विधिवत रुपमा उद्घाटन गरेको छ । कार्यक्रमका प्रमुख अतिथि, विशिष्ट अतिथि लगायतले मण्डपको उदघाटन गरेका हुन् ।
कार्यक्रमका अवसरमा संघमा आबद्ध पुराना व्यवसायी कनकाई ८ लक्ष्मीपुरस्थित नेहा टेलर्सका सञ्चालक महमद नजामोदिनलाई सम्मान गरिएको छ । त्यस्तै संघको भवन परिसरमा रहेको मण्डप निर्माणमा सहयोग गर्ने दाताहरुलाई प्रशंसा पत्रद्वारा सम्मान गरिएको मण्डप निर्माण समितिका संयोजक समेत रहेका नवनिर्वाचित उद्योग उपाध्यक्ष टिकाराम बरालले जानकारी दिए ।
कार्यक्रममा प्रमुख अतिथि राउतसँगै विशिष्ट अतिथि कोशी उद्योग वाणिज्य महासंघका संस्थापक अध्यक्ष एवं संघका केन्द्रिय सदस्य नरेन्द्र खड्का , नेपाल उद्योग वाणिज्य महासंघका केन्द्रिय सदस्य उमेश डालमिया, महासंघ कोशी प्रदेशका उपाध्यक्ष एवं कनकाई उद्योग वाणिज्य संघका पूर्व अध्यक्ष कुमारमणि पोखरेल ,कोशी प्रदेश सदस्य वीरेन्द्र शाह , कनकाई उद्योग वाणिज्य संघका संस्थापक अध्यक्ष युवराज संग्रौला, राजनीतिक दलका तर्फबाट नेपाली कांग्रेस कनकाई नगर सभापति दुर्गा प्रसाई, कनकाई बहुमुखी क्याम्पस सुरुङ्गाका अध्यक्ष प्रकाश चुडाल लगायतले शुभकामना मन्तव्य राखेका थिए ।
कनकाई उद्योग वाणिज्य संघका महासचिव सरोज सिटौलाको संचालन तथा वाणिज्य उपाध्यक्ष जविन तिम्सिनाले स्वागत गरेको कार्यक्रममा कनकाई नगरपालिकाकी उपप्रमुख आशा शिवाकोटी, नेपाल उद्योग वाणिज्य महासंघका केन्द्रिय सदस्य गोकुल श्रेष्ठ, संघको प्रदेश तथा विभिन्न जिल्लामा रहेका शाखा अध्यक्ष एवं प्रतिनिधिहरु, कनकाई नगर क्षेत्रका जनप्रतिनिधिहरु, विभिन्न सामाजिक तथा शैक्षिक संघसंस्थाका प्रमुख तथा प्रतिनिधिहरु, सुरक्षाकर्मी, उद्योगी व्यवसायीहरु, संस्थालाई सहयोग गर्ने विभिन्न दाताहरू सहित संघमा आवद्ध पूर्व पदाधिकारी तथा सदस्यहरुको समेत उपस्थिति रहेको बताइएको छ ।
