कनकाई खबर \ प्रजातान्त्रिक आन्दोलनका अग्रणी योद्धा स्व. तुर्सा हेमरमको २९ औं स्मृति दिवस विशेष कार्यक्रमका साथ मनाइएको छ । तुर्सा हेमरम स्मृति प्रतिष्ठान परिसर कनकाई १ मा आइतबार आयोजित कार्यक्रममा तुर्सा हेमरमले प्रजातान्त्रिक आन्दोलनमा गरेको योगदानको चर्चा गरिएको थियो ।
प्रतिष्ठानका अध्यक्ष गोपालकुमार बस्नेतको सभापतित्व एवं संविधान सभा सदस्य सुधिरकुमार शिवाकोटीको प्रमुख आतिथ्य रहेको कार्यक्रममा प्रमुख अतिथी शिवाकोटीले सम्बोधन गर्दै नेपालको लोकतान्त्रिक आन्दोलनमा संघर्षपूर्ण जीवन बिताएर जेलनेल, प्रवास र सर्वस्वहरण समेत भोगेका आदिवासी नेता स्व. तुर्सा हेमरमको योगदानको उच्च मूल्याङ्कन हुनुपर्ने बताए ।
कार्यक्रममा प्रमुख अतिथि शिवाकोटीले लोकतन्त्रका लागि हेमरमले भोग्नु परेको कठोर यातना त्याग र बलिदानको स्मरण गर्दै मुलुकमा उत्पन्न बिषम पिरिस्थितिको निकासका लागि तुर्सा हेमरमको आदर्शलाई कहिल्यै भुल्नु नहुने धारणा राखे ।
त्यसैगरी प्रतिष्ठानका अध्यक्ष गोपालकुमार बस्नेतले स्व. तुर्सा हेमरमको योगदानलाई सुरक्षित गर्न र समाजमा उहाँको कृतिलाई अमर बनाइराख्न प्रतिष्ठानको स्थापना गरिएको बताए । प्रतिष्ठानको गतिविधि र भावी कार्यक्रमको बारेमा जानकारी गराउँदै बस्नेतले भवन निर्माण कार्य समाप्त भइसकेपछि यसको ब्यवस्थापनको जिम्मेवारी समुदायमै हस्तान्तरण गरिने जानकारी दिए ।
कार्यक्रममा नेपाली कांग्रेस झापा सभापति देउकुमार थेबे, उपसभापति केशवराज पाण्डे, सचिव कृष्ण हुमागाईं , कनकाई नगरपालिका उपप्रमुख आशा शिवाकोटी, प्रजातन्त्र सेनानी आदिवासी नेता सुरेश बास्के, उमा सिटौला, रश्मिशेखर सुवेदी, तुर्सा हेमरमका परिवारजन लगायत कांग्रेसका नेता÷कार्यकर्ताको उपस्थिति रहेको थियो। कार्यक्रममा स्व. हेमरमका नाति सुन्दरले आफ्ना हजुरबाको योगदानको स्मरण गर्दै परिवारको तर्फबाट सुझाव प्रस्तुत गरेका थिए भने स्व. तुर्साको जीवनी वाचन सदस्य शिवकुमार कंडेलले गरेका थिए । प्रतिष्ठानका उपाध्यक्ष टिका मैनालीले स्वागत गरेको कार्यक्रमको सञ्चालन सचिव कुमारमणि पोखरेलले गरेका थिए ।
