कनकाई खबर \ फागुन २१ गते हुने प्रतिनिधि सभा निर्वाचनका लागि नेकपा एमालेले झापा क्षेत्र नं ५ बाट पार्टी अध्यक्ष केपी शर्मा ओलीको नाम सिफारिस गर्ने निर्णय गरेको छ ।
आज सम्पन्न क्षेत्रीय समन्वय कमिटी क्षेत्र नं.५ को बैठकले अध्यक्ष ओलीको एकल नाम सिफारिस गरेको बताइएको छ । नेकपा एमाले झापाका सचिव तुलसी कार्कीका अनुसार झापा ५ का लागि सर्वसम्मत रुपमा अध्यक्ष ओलीको नाम सिफारिस गरिएको हो ।
त्यस्तै क्षेत्र नं ४ बाट एलपी साँवा सहित तीन जनाको नाम सिफारिस गरिएको छ। निर्वाचन क्षेत्रीय कमिटीले दिएको जानकारी अनुसार हीरा थापा र भोजकुमारी नेपाललाई पनि उम्मेद्वारको रुपमा सिफारिस गरिएको छ ।
साँवाले यस क्षेत्रबाट २०७४ र ०७९ को निर्वाचनमा विजयी हासिल गरेका थिए । २०७० को संविधानसभा निर्वाचनमा झिनो मतले पराजित साँवा जनताका समस्या संसदमा निरन्तर आवाज उठाएर समाधानका लागि पहल गर्ने नेताको रुपमा चिनिन्छन् । थापा २०७४ मा प्रदेश सभा सदस्यका रुपमा निर्वाचित भइ कार्यकाल पूरा गरिसकेका यस क्षेत्रका पुराना कम्युनिष्ट नेता हुन भने नेपाल शिवसताक्षी नगरपालिकामा २०७४ को स्थानीय तह निर्वाचनमा उपमेयरको जिम्मेवारीमा निर्वाचित भइ सफलतापूर्वक आफ्नो कार्य सम्पादन गरिसकेकी महिला नेतृ हुन् ।
फागुन २१ गते हुने प्रतिनिधि सभा निर्वाचनका लागि नेकपा एमालेले देशका अधिकांस निर्वाचन क्षेत्रबाट प्रतिनिधि सभा निर्वाचनका लागि उम्मेद्वारको नाम सिफारिस गरेको जनाएको छ ।
