कनकाई खबर \ नेपाल पत्रकार महासंघ झापा शाखाका कोषाध्यक्ष एवं मेची सामुदायिक सेवा केन्द्रका अध्यक्ष पत्रकार मुक्ति पौडेललाई पितृ शोक परेको छ ।
पौडेलका पुजनीय पिता चन्द्रबहादुर पौडेलको ८८ वर्षको उमेरमा हिजो बुधबार राती १०ः३० बजेको समयमा मेचीनगर १०, काकडभिट्टास्थित निजी निवासमा निधन भएको पारिवारीक स्रोतले जनाएको छ । स्व.पौडेलको आज बिहिबार बिहान १०ः३० बजे स्थानीय मेची नदि किनारमा दाहसंस्कार गरिने जनाइएको छ । स्व.बुबाको असामयिक निधनको खबरले सम्पूर्ण झापाली पत्रकारहरु स्तब्ध एवं मर्माहत बनेका छन् ।
वि.सं १९९५ मंसिर १९ गते तत्कालीन यासोक (हाल कुमायक–१, पाँचथर) मा पिता दल बहादुर पौडेल र माता यशोदा पौडेलको कान्छो सुपुत्रका रूपमा जन्मिएका स्व.पौडेल एक निष्ठावान एवं स्थानीयस्तरका एक सम्मानित जेष्ठ नागरिकका रुपमा स्थापित व्यक्तित्व हुन् । बुबाको निधनले पौडेल परिवार एवं समाजलाई अपूरणीय क्षति पुगेको छ ।
यस दुःखद घडीमा झापाको कनकाईमा प्रधान कार्यालय रहेको कनकाई खबर डटकम अनलाइन सहित कनकाई खबर साप्ताहिकका तर्फबाट दिवंगत आत्माको चिरशान्तिको कामना गर्दै भावपूर्ण श्रद्धाञ्जलि अर्पण गरिएको छ । साथै, शोकमा रहेका मुक्ति पौडेल, मीना पौडेल, ममता पौडेल, मानव पौडेल लगायत सम्पूर्ण शोकाकुल परिवारजनमा धैर्यधारण गर्ने ईश्वरीय शक्ति प्राप्त होस् भन्दै कनकाई खबरका तर्फबाट गहिरो समवेदना प्रकट गरिएको छ ।
