कनकाई खबर \ झापामा पठन संस्कृतिको विकासलाई लक्ष्य गर्दै एक भव्य समारोहका बीच ‘पठन संस्कृति वर्ष २०२६’ घोषणा गरिएको छ ।
झापाका सय भन्दा बढी सामाजिक, साहित्यिक तथा व्यावसायिक संघसंस्थाहरूको सामूहिक अभियानअन्तर्गत सो घोषणा गरिएको हो ।
बिर्तामोडमा सोमबार आयोजित एक विशेष कार्यक्रममा लेखक तीर्थ सिग्देलको कृति ‘त्यो झापा’ (इतिहास) र लेखक हेम गुरागाईंको उपन्यास ‘दिगो समाधान’ विमोचनसँगै पठन संस्कृति वर्ष २०२६ घोषणा गरिएको हो ।
कार्यक्रममा उपस्थित अतिथीहरुलाई कार्यक्रमका सह–संयोजक केशव मैनालीले स्वागत गर्दै कार्यक्रमको औचित्यमाथी प्रकाश पारेका थिए ।
कार्यक्रमको उद्देश्यबारे जानकारी दिँदै लेखक तीर्थ सिग्देलले सन् २०२६ लाई पठन संस्कृति वर्षका रूपमा मनाउन सामाजिक स्तरबाट अभियान सुरु गरिएको र यसलाई सरकारी कार्यक्रमका रूपमा अघि बढाउन सरकारसमक्ष ज्ञापन पत्र मार्फत आग्रह गरिने बताए ।
उनका अनुसार पठन संस्कृतिको विकासका लागि संघसंस्था, शैक्षिक प्रतिष्ठान, वित्तीय संस्था, सामाजिक व्यक्तित्व तथा विद्यार्थीहरूलाई लक्षित गर्दै सन्देशमूलक कार्यक्रम सञ्चालन गरिनेछ ।
अभियानअन्तर्गत सबै संघसंस्थासँग सहकार्य गरी विभिन्न सिर्जनात्मक गतिविधि सञ्चालन गर्ने, स्थानीय तहसहित सरोकारवाला संस्थाहरूको सहभागितामा शैक्षिक सरोकार समिति गठन गर्ने तथा समाजमा पठन संस्कृतिको प्रभाव विस्तार गर्ने कार्यक्रम रहेको जनाइएको छ ।
कार्यक्रममा सहकारी तथा सामाजिक अभियन्ता महेन्द्रकुमार गिरीले झापामा रहेका अस्पतालहरूमा कुरुवाका लागि पुस्तक पढ्ने स्थानको व्यवस्था हुनुपर्ने बताए ।
साहित्य, कला र संस्कृतिलाई समेट्ने कार्यक्रमका लागि एक करोड रुपैयाँको अक्षय कोष स्थापना गर्न अभियान चलाउनुपर्ने उनको सुझाव थियो ।
साथै, हरेक कार्यक्रममा मायाको चिनोका रूपमा पुस्तक उपहार दिने, बच्चाको मुख हेर्न जाँदा पुस्तक लैजाने र यात्रामा पुस्तक बोक्ने संस्कृतिलाई फेशनका रूपमा विकास गर्नुपर्नेमा उनले जोड दिए ।
कार्यक्रममा वरिष्ठ अधिवक्ता तथा लेखक लीला उदासीले झापाको इतिहासबारे विवेचना प्रस्तुत गरे भने सामाजिक अभियन्ता तथा लेखक केदार शर्माले पठन संस्कृतिले समाजमा पार्ने सकारात्मक प्रभावबारे धारणा राखे ।
अभियानका लागि अभियान्ता, वीरता रिडर्स, रिडर्स अभियान नेपाल र झापाली साहित्य समाजको आयोजनामा भएको कार्यक्रमको संयोजन इशा बुक्स सेन्टर, मिडिया रिसर्च सेन्टर तथा सहकार्य न्यूटन्स एजुकेशन एकेडेमीले गरेको थियो ।
कार्यक्रममा झापाका सयभन्दा बढी साहित्यिक, सामाजिक तथा व्यावसायिक संघसंस्थाका प्रमुख तथा प्रतिनिधि, शैक्षिक प्रतिष्ठान, वित्तीय संस्था, सामाजिक व्यक्तित्व तथा विद्यार्थी गरी करिब २५० जनाको सहभागिता रहेको थियो । सोही अवसरमा गीत, कविता र गजल वाचन लगायत साहित्यिक प्रस्तुतिहरू पनि गरिएको थियो ।
पहिलो साहित्यिक श्रृङखलाको सञ्चालन साहित्यकार तथा लेखक खगेन्द्रा खुसी र दोश्रो घोषणा कार्यक्रमको सञ्चालन मिडिया रिर्सज सेन्टरका संयोजक तथा पत्रकार सन्तोष आर्चायले गरेका थिए ।
