कनकाई खबर \ सुरुङ्गा जेसीजको अध्यक्षमा मेनुका उप्रेती शिवाकोटी सर्वसम्मत रुपमा चयन भएकी छन् । शुक्रबार सम्पन्न जेसीजको १८ औं वार्षिक साधारण सभा एवं शाखा अधिवेशनबाट वर्ष २०२६ का लागि निर्वाचन प्रक्रियाबाट टुङ्गो लगाउनु पर्ने अध्यक्ष लगायत केही पदाधिकारीहरु सर्वसम्मत रुपमा चयन भएको हो ।
लामो समयदेखी स्थानीय स्तरका विभिन्न सामाजिक संघसंस्थामा सक्रिय उप्रेतीको नेतृत्वमा सर्वसम्मत भएका कार्यकारिणी उपाध्यक्षद्वयमा खुस्बु पौडेल तिम्सिना र पूर्णकुमार नेवार, चारजना उपाध्यक्षहरु क्रमशः अनिल पोखरेल, रोहित शिवाकोटी, विद्या खड्का र अर्बिट कडरिया, जनसम्पर्क अधिकारीमा भिम राजवंशी र तालिम निर्देशक सुस्मीता बाँस्तोला दहाल सर्वसम्मत रुपमा चयन भएका हुन् ।
कानुनी सल्लाहकार, महासचिव लगायतका अन्य जिम्मेवारीमा मनोनित गरी नवनिर्वाचित अध्यक्ष उप्रेतीले चाँडै समितिलाई पूर्णता दिने बताएकी छन् । अध्यक्ष उप्रेतीको नेतृत्वमा सुरुङ्गा जेसीजले आगामी वर्ष २०२६ मा सिर्जनात्मक, प्रभावकारी एवं सामुदायिक हितको कार्यक्रमलाई प्राथमिकता दिने अपेक्षा गरिएको छ ।
सर्वसम्मत नेतृत्व चयनका लागि पुर्व अध्यक्ष दुर्गाप्रसाद पाठक(राजु)को संयोजकत्वमा गठन भएको निर्वाचन समितिले भूमिका खेलेको बताइएको छ ।
जेसीजको आगामी पुष ४ देखी जनकपुर धामको तिरहुतिया गाछीमा हुने ५२ औं राष्ट्रिय महाधिवेशनमा सहभागी भएर आएपछि शाखाले समितिको पूर्णतासँगै विशेष कार्यक्रमसहित पदहस्तान्तरण कार्यक्रम सम्पन्न गर्ने जनाइएको छ ।
वर्ष २०२५ का अध्यक्ष दिपेन्द्र प्रधानको अध्यक्षतामा सम्पन्न शाखाको साधारण सभा सहितको अधिवेशनमा महासचिव र कोषाध्यक्षको प्रतिवेदन सर्वसम्मत रुपमा पारित भएको बताइएको छ । महासचिव पूर्णकुमार नेवारले संचालन गरेको औपचारिक कार्यक्रममा जेसीजका पुर्व अध्यक्षहरु कुमारमणि पोखरेल, शिवकुमार कडेल, सरला दहाल पोखरेल, त्रिलोचन उप्रेती, सुस्मा उप्रेती लगायतले शुभकामना मन्तव्य राखेका थिए ।
