कनकाई खबर \ नेपाल पत्रकार महासंघ झापा शाखाले अन्तर्राष्ट्रिय भ्रष्टाचारविरुद्धको दिवसका अवसरमा पत्रकार इन्दु पूर्वेली, सुरेन्द्र भण्डारी र चिरञ्जीवी घिमिरेलाई टंकप्रसाद–रमादेवी पाठक पत्रकारिता पुरस्कार प्रदान गर्दै सम्मान गरेको छ ।
सुशासन प्रवद्र्धन र भ्रष्टाचारविरुद्ध कलम चलाउँदै समाजमा योगदान पुर्याउने पत्रकारलाई हरेक वर्ष यो पुरस्कार प्रदान गरिँदै आएको छ
नेपाल पत्रकार महासंघ झापा शाखाले मंगलवार आयोजित विशेष समारोहमा पत्रकारिता पुरस्कार प्रदान गरेको छ। नेपाल प्रेस काउन्सिलका अध्यक्ष डा. कुमार शर्मा आचार्यले नगद राशि र सम्मानपत्रसहित पत्रकारहरुलाई सम्मान गरेका हुन्।
हेम सरिता फाउन्डेसन अमेरिकासँगको सहकार्यमा स्थापना गरिएको अक्षयकोषको ब्याजबाट हरेक वर्ष रु ५० हजार ५५५ राशिको पुरस्कार वितरण हुँदै आएको छ। यस वर्षको पुरस्कारबाट पत्रकार चिरञ्जीवी घिमिरेलाई सम्मान गरिएको छ भने गत वर्षको पुरस्कारबाट पत्रकार इन्दु पूर्वेली र सुरेन्द्र भण्डारीलाई रु २५ हजार २२५ का दरले सम्मानित गरिएको हो। यसअघि सो पुरस्कारबाट पत्रकार राजबाबु शङ्कर पुरस्कृत भएका थिए।
यसैगरी लैङ्गिक हिंसाविरुद्ध कलम चलाउने पत्रकार जोस्ना श्रेष्ठ र रञ्जिता खड्कालाई पनि नगद पाँच हजारका दरले सम्मान गरिएको छ।
कार्यक्रमका प्रमुख अतिथि प्रेस काउन्सिल अध्यक्ष डा. आचार्यले पत्रकारिताप्रति उच्च सम्मान व्यक्त गर्दै विकृति र विसंगति विरुद्ध दृढतापूर्वक लड्ने प्रतिबद्धता जनाए। उनले काउन्सिलमा रहेर कसैको दबाबमा गलत काम नगर्ने स्पष्ट धारणा राख्दै पत्रकारिता क्षेत्रको हितमा योगदान गर्ने योजना प्रस्तुत गरे।
त्यस्तै, प्रेस काउन्सिलका मुख्य अधिकृत झबिन्द्र भुसालले पत्रकारहरुलाई आचारसंहिता पालनामा सचेत रहन आग्रह गर्दै मिडिया क्षेत्रको अस्तित्व पत्रकारकै जिम्मेवारीमा निर्भर रहेको बताए।
कार्यक्रममा महासंघ झापाका पूर्व अध्यक्ष केशव आचार्य, पुरस्कृत पत्रकार घिमिरे लगायतले आ आफनो धारणा राखेका थिए । महासंघ झापाका अध्यक्ष एकराज गिरीको अध्यक्षतामा सम्पन्न कार्यक्रममा स्वागत उपाध्यक्ष सुव्रत न्यौपानेले गरेका थिए भने सञ्चालन सचिव राजु पाठकले गरेका थिए।
