कनकाई खबर \ झापाको कनकाई नगरपालिकामा लैङ्गिक हिंसा विरुद्धको १६ दिने अभियान सुरु भएको छ ।
हरेक वर्ष नोभेम्बर २५ देखि डिसेम्बर १० सम्म विश्वभर मनाइने लैङ्गिक हिंसा विरुद्धको १६ दिने अभियान यस वर्ष पनि सुरु भएको हो । जस अन्तर्गत कनकाई नगरपालिकामा उपप्रमुख आशा शिवाकोटीको अध्यक्षतामा अन्तरक्रिया कार्यक्रम संचालन गर्दै अभियानको शुभारम्भ गरिएको हो । अभियान अन्तर्गत यस वर्षको अन्तर्राष्ट्रिय नारा ‘सबै महिला र बालिकामाथि हुने डिजिटल हिंसाको अन्त्य गर्न जुटौँ’ साथै राष्ट्रिय नारा ‘प्रविधिको सही प्रयोग गरौँः लैङ्गिक हिंसा अन्त्य गरौँ’ भन्ने रहेको बताइएको छ ।
अभियानको मुख्य उद्येश्यका बारेमा जानकारी दिँदै उपप्रमुख शिवाकोटीले महिलामाथि हुने हिंसाविरुद्ध व्यापक जनचेतना जगाउने र समस्याको पहिचान गरी समाधानका लागि राज्यलाई कानुनी आधार तय गर्न सहकार्य गर्नु पर्ने कार्यलाई जोड दिएकी छन् । त्यस्तै लैङ्गिक हिंसा विरुद्ध पुरुषको सहकार्यलाई अभिवृद्धि गर्नु, लैङ्गिक समानता तथा सामाजिक न्यायका क्षेत्रमा काम गर्ने अधिकारकर्मीबीच ऐक्यबद्धता गर्नु, लैङ्गिक हिंसाका विविध आयाममा रणनीतिक छलफल गर्नु १६ दिने अभियानको मुख्य उद्देश्य रहेको उपप्रमुख शिवाकोटीले जानकारी दिएकी छन् ।
अभियानअन्तर्गत विश्वव्यापी रुपमै महिला हिंसासँग सम्बन्धित चरणबद्ध अन्तरक्रिया, सडक नाटक, पोष्टर तथा पम्प्लेट प्रतियोगिता, सार्वजनिक सुनुवाइ, सूचना÷शिक्षा सामग्रीको प्रदर्शन, सञ्चार अभियान लगायतका कार्यक्रम हुँदै आएको जानकारी दिँदै उपप्रमुख शिवाकोटीले कनकाई नगर क्षेत्रमा समेत विद्यालयस्तरीय कार्यक्रम साथै विभिन्न सामाजिक संघसंस्थासँगको सहकार्यमा अभियानलाई निरन्तरता दिइने बताएकी छन् ।
कनकाई नगरपालिकाको महिला शाखाले आयोजना गरेको कार्यक्रममा कनकाई वडा नं.१ का वडासदस्य निर्मला खड्काले स्वागत तथा कनकाई नगरपालिकाकी महिला तथा बालबालिका शाखा प्रमुख तुलसा थापाले औचित्य माथि प्रकाश पारेको कार्यक्रममा कनकाई नगरपालिकाका प्रमुख प्रशासकीय अधिकृत नारायण न्यौपानेले लैङ्गिक हिंसाविरुद्ध जनचेतना फैलाउने र प्रविधिको सही प्रयोग मार्फत हिंसा रोक्ने अभियानको उद्येश्यका बारेमा जानकारी दिए । यसै सन्दर्भमा नेपाल सरकारले लैङ्गिक हिंसाको सम्बोधनका लागि नीतिगत, कानुनी व्यवस्थाका साथै विभिन्न अभियानमूलक र सचेतनात्मक कार्यक्रम सञ्चालन गर्दै आएको प्रमुख प्रशासकीय अधिकृत न्यौपानेले जानकारी दिए ।
शाखाकी कर्मचारी टिका खतिवडाले सहजीकरण गरेको अन्तरक्रियामूलक कार्यक्रममा कनकाई नगरपालिकाकी प्रशासन शाखा प्रमुख जमुना कटुवाल, कनकाई वडा नं.२ का वडाअध्यक्ष बलराम राई, कार्यपालिका सदस्य नवलकिशोर दत्त लगायतले ‘लैङ्गिक हिंसा मानव अधिकारको हनन हो’ भन्ने विषयमा राष्ट्रिय तथा अन्तर्राष्ट्रिय रुपमा जनचेतना विस्तार गर्न नेपालले पनि हरेक वर्ष नोभेम्बर २५ तारिखमा महिला हिंसा विरुद्धको राष्ट्रिय अभियान दिवसका रुपमा मनाउने गरेको बताए ।
सन् १९८० को दशकदेखि नै विभिन्न मुलुकले महिलामाथि हुने हिंसा विरुद्धको दिवस मनाउँदै आएको भए पनि सन् १९९९ मा संयुक्त राष्ट्रसंघले अनुमोदन गरेपछि महिलामाथि हुने हिंसा विरुद्धको विभिन्न अभियान सुरु भएको बताइएको छ । नेपालमा यो दिवस सन् १९९७ देखि विभिन्न कार्यक्रमको आयोजना गरी मनाउन थालिएता पनि वि.सं. २०७५ कात्तिक २९ गतेको मन्त्रिपरिषद्को बैठकले हरेक वर्ष नोभेम्बर २५ तारिखलाई महिला हिंसा विरुद्धको १६ दिने अभियान दिवसका रुपमा मनाउने घोषणा गरेको बताइएको छ । यसैलाई प्रभावकारी कार्यान्वयन गर्ने उद्देश्यले सबै समुदायदेखि तल्लो तहसम्म विभिन्न गतिविधि र कार्यक्रम गरी यो दिवस मनाउन थालिएको कार्यक्रममा सहभागीहरुले जानकारी दिए ।
नेपालको संविधानले लैङ्गिक विभेदको अन्त्य गरी आर्थिक समानता, समृद्धि र सामाजिक न्याय सुनिश्चित गर्न समानुपातिक समावेशी र सहभागितामूलक सिद्धान्तका आधारमा समतामूलक समाजको निर्माण गर्ने सङ्कल्प गरेको बताइएको छ ।
